دۇنيەجۇزىلىك دەنساۋلىق ساقتاۋ ۇيىمىنا - مەرەيلى 50 جىل
الماتى قالاسى المالى اۋدانىنداعى 12 مەديسينالىق ۇيىم اراسىندا جارىس ۇيىمداستىرىلدى، دەپ حابارلايدى Almaty-akshamy.kz.
حالىقارالىق مەيىرگەر كۇنى قارساڭىندا الماتىدا مەديسينا قىزمەتكەرلەرى اراسىندا كاسىبي بايقاۋ ءوتىپ جاتىر. ءوز ماماندىعى بويىنشا ۇزدىكتەردىڭ ءبىلىمىن، تاجىريبەسى مەن داعدىلارىن الدىڭعى قاتارلى مايتالمان مەدبيكەلەر مەن سالا ارداگەرلەرى كىرەتىن قۇزىرەتتى قازىلار القاسى باعالايدى.
"سىزدەرگە شىعارماشىلىق شابىت، جوعارى مانساپ، ءبىلىم تىلەيمىن – بۇل ءۇشىن بۇگىندە بارلىق جاعداي بار. ءسىز ماگيستر، عىلىم دوكتورى بولا الاسىز، مەديسينانىڭ ءتۇرلى سالاسىن دامىتا الاسىز. بيىل دۇنيەجۇزىلىك دەنساۋلىق ساقتاۋ ۇيىمىنا مەرەيلى 50 جىل، بۇگىندە بارلىق نازار مساك-قا اۋىپ وتىر. سوندىقتان دا بولار، دەنساۋلىق ساقتاۋ مينيسترلىگىنىڭ بايقاۋىندا "ۇزدىك مساك مەدبيكەسى" نوميناسياسى قىزىلمەن ەرەكشەلەنىپ تۇر. بارلىق قاتىسۋشىلارعا ساتتىلىك تىلەيمىن، كىم جەڭىمپاز بولاتىنى ماڭىزدى ەمەس، تەك جەڭۋ ەمەس، قاتىسۋ دا ماڭىزدى. بۇگىن سىزدەر ءۇشىن ءوز ءبىلىمىڭىز بەن كاسىبي داعدىلارىڭىزدى كورسەتۋگە تاماشا مۇمكىندىك تۋدى. بيىل مەدبيكەلىك ءىستىڭ نەگىزىن قالاعان فلورەنس نايتينگەيل ءۇشىن دە مەرەيلى جىل، ول 200 جاسقا تولار ەدى. دۇنيەدەگى كەرەمەت ءارى بىرەگەي ماماندىقتىڭ دۇنيەگە كەلۋىنە ءبىز وعان قارىزدارمىز. بۇگىن مەدبيكە ءىسى سالاسىندا ءوزىن-وزى جەتىلدىرۋگە ءارى وسۋگە بارلىق مۇمكىندىك بار"، - دەپ اتاپ ءوتتى جارىسقا قاتىسۋشىلار الدىندا الماتى قالاسى مەدبيكە ءىسىن دامىتۋ جونىندەگى ۇيلەستىرۋشى ماييا ابابكوۆا.
بۇگىنگى جارىس الماتى قالاسى المالى اۋدانىنداعى 12 مەديسينالىق ۇيىم اراسىندا ۇيىمداستىرىلدى. بۇل – تالاپكەرلەر ءۇشىن قالالىق جانە رەسپۋبليكالىق تۋرعا دەيىنگى ارالىق كەزەڭ. بايقاۋدىڭ قالالىق كەزەڭىنىڭ قورىتىندىسى 28 ساۋىردە بەلگىلى بولادى. جەڭىمپازدار الماتى قالاسىن رەسپۋبليكالىق دەڭگەيدە قورعايدى.