قاراعاندىدا بيزنەس وكىلدەرىنىڭ سۇراقتارىنا جاۋاپ بەرە وتىرىپ، ءماجىلىس دەپۋتاتى ازات پەرۋاشيەۆ اەس جوباسى جاڭا جۇمىس ورىندارىن اشىپ، ينجەنەرلىك ينفراقۇرىلىمنىڭ دامۋىنا سەرپىن بەرەتىنىن مالىمدەدى.
اتوم ەنەرگەتيكاسى ۇزاق مەرزىمدى پەرسپەكتيۆادا ەلەكتر ەنەرگياسىنىڭ تۇراقتى باعاسىن قامتاماسىز ەتەدى، دەپ جازادى inkaraganda.kz.
بۇل، اسىرەسە، قازاقستان ەكونوميكاسىنىڭ باسەكەگە قابىلەتتىلىگىن ارتتىرۋ جانە ونەركاسىپتىڭ دامۋى ءۇشىن ماڭىزدى.
«قازىرگى ۋاقىتتا ەۋروپالىق ەلدەر «كومىرتەك ءىزىنىڭ» پروبلەماسىنا قاتتى الاڭداۋدا، ولار كومىرمەن جۇمىس ىستەيتىن ەلەكتر ستانسيالارىن بىرتىندەپ جاۋىپ جاتىر. ال كومىر ستانسيالارىنان وندىرىلگەن ەنەرگيامەن شىعارىلاتىن تاۋارلارعا قوسىمشا سالىقتار سالىنادى. بۇل وتاندىق وندىرۋشىلەرگە ۇلكەن شەكتەۋلەر قويادى، ولاردىڭ ەكسپورتتىق ونىمدەرى باسەكەگە قابىلەتسىز بولىپ، كىرىستەرى ازايادى»، – دەپ اتاپ ءوتتى پەرۋاشيەۆ.
ونىڭ پىكىرىنشە، قازاقستاندىقتار الەمدىك ەنەرگەتيكانىڭ وزىق تەحنولوگيالارىن قولدانۋى كەرەك جانە زاماناۋي عىلىمي-تەحنولوگيالىق تاجىريبەلەردى مەڭگەرۋى ءتيىس.
«قازاقستان وركەنيەتتەن ارتتا قالماۋى ءتيىس. ءبىز اتوم ەلەكتر ستانسياسىن سالا المايمىز نەمەسە بىلىكتى ماماندار جوق دەگەن پىكىرمەن مۇلدەم كەلىسپەيمىن. قازاقستاندا مىڭداعان ستۋدەنتتەر، ونىڭ ىشىندە شەتەلدە دە، اتوم ەنەرگەتيكاسىنا قاتىستى ماماندىقتار بويىنشا ءبىلىم الۋدا. ولار وسكەمەندەگى ءۇلبى مەتاللۋرگيالىق زاۋىتىندا، قىتايعا ەكسپورتتالاتىن يادرولىق وتىن وندىرىلەتىن جەردە، الماتىداعى يادرولىق فيزيكا ينستيتۋتىندا، سونداي-اق كۋرچاتوۆتاعى ۇلتتىق يادرولىق ورتالىقتا تاجىريبەدەن وتۋدە»، – دەپ ءتۇسىندىردى دەپۋتات.