دارىگەرلەر اەس سالۋدىڭ ەكولوگيالىق جاعدايدى جاقسارتۋعا ىقپال ەتەتىنىنە قىزىعۋشىلىق تانىتتى، سەبەبى ۇلت ساۋلىعى ءۇشىن وندىرىستەن زياندى زاتتاردىڭ از ءبولىنۋى ماڭىزدى.
مۇنداي پىكىر الماسۋ اقتوبە وبلىسىنداعى مارتوك اۋداندىق حالىقتىق شتابتىڭ اۋداندىق ورتالىق اۋرۋحانا ۇجىمىمەن كەزدەسۋىندە ءوربىدى.
شتاب مۇشەسى قىدىرباي شۋدابايەۆتىڭ ايتۋىنشا، اتوم ەلەكتر ستانسالارى قورشاعان ورتانى ءتۇتىن گازدارى، كۇل جانە مۇناي ونىمدەرىمەن لاستامايتىندىعى ساراپشى مامانداردىڭ دالەلدى پىكىرلەرى ارقىلى راستالعان. ول الەمدەگى دامىعان جانە دامۋشى ەلدەردىڭ اەس پايدالانۋ تاجىريبەسىن مىسالعا كەلتىردى.
AMANAT پارتياسىنىڭ مارتوك اۋداندىق فيليالى ءتوراعاسى انۋار يسكارين ەنەرگەتيكا ماماندارىنىڭ يادرولىق ەنەرگيانى «جاسىل» دەپ تانيتىنىن اتاپ ءوتتى. ونىڭ سوزىنشە، اەس كومىر جانە گاز ستانسالارىمەن سالىستىرعاندا ايتارلىقتاي از زياندى شىعارىندىلارعا يە جانە ەكولوگيالىق جاعىنان تازا ەنەرگيا كوزى بولىپ تابىلادى.
كەزدەسۋدە سونىمەن قاتار اۋداننىڭ ەلەكتر ەنەرگياسىنا بايلانىستى ماسەلەلەرى دە كوتەرىلدى. انۋار يسكاريننىڭ ايتۋىنشا، مارتوك اۋدانىندا ەلەكتر جەلىلەرىنىڭ 80 پايىزىنىڭ توزۋى سەبەپتى اۋا رايىنىڭ قولايسىزدىعى كەزىندە ءجيى جارىق وشەدى. بۇل جاعدايدى تۇزەتۋ ءۇشىن قوماقتى قاراجات قاجەت، ال ءقازىر ەلىمىز 100 ملرد تەڭگەدەن استام قاراجاتقا وزگە ەلدەردەن ەنەرگيا ساتىپ الۋدا. ەلەكتر ەنەرگياسىن تۇتىنۋ كولەمىنىڭ جىل سايىن ارتىپ كەلە جاتقانىن دا ەسكەرگەن ءجون.