مۇگەدەكتىك بويىنشا مەملەكەتتىك الەۋمەتتىك جاردەماقى الۋشىلاردىڭ سانى 539،6 مىڭ ادامدى قۇرايدى.
جىل باسىنان بەرى قازاقستان ۇكىمەتى كومەككە مۇقتاج ازاماتتارعا 217 ملرد تەڭگەدەن استام قاراجات تولەدى، دەپ حابارلايدى Almaty-akshamy.kz.
«1 شىلدەدەگى جاعداي بويىنشا، قازاقستاندىقتارعا مۇگەدەكتىك جانە اسىراۋشىسىنان ايىرىلۋ بويىنشا جاردەماقى تۇرىندە 217 ملرد تەڭگەدەن استام قاراجات تولەندى. ونىڭ ىشىندە 2022 جىلدىڭ ماۋسىم ايىندا رەسپۋبليكالىق بيۋدجەتتەن مۇگەدەكتىگى بويىنشا مەملەكەتتىك الەۋمەتتىك جاردەماقى تولەۋگە 30،7 ملرد تەڭگە، اسىراۋشىسىنان ايىرىلۋ جاعدايىنا 10،5 ملرد تەڭگە ءبولىندى»،- دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
2022 جىلعى 1 شىلدەدەگى جاعداي بويىنشا، مۇگەدەكتىك بويىنشا مەملەكەتتىك الەۋمەتتىك جاردەماقى الۋشىلاردىڭ سانى 539،6 مىڭ، اسىراۋشىسىنان ايىرىلۋ جاعدايى بويىنشا 189،9 مىڭ ادامعا جەتتى.
مۇگەدەكتىك جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى مۇگەدەكتىك توبىنا جانە سەبەبىنە، قايتىس بولعان (قازا تاپقان) اسىراۋشىنىڭ اسىراۋىنداعى ادام سانىنا، سونداي-اق ءتيىستى قارجى جىلىنا ارنالعان «رەسپۋبليكالىق بيۋدجەت تۋرالى» زاڭدا بەلگىلەنەتىن ەڭ تومەنگى كۇنكورىس دەڭگەيىنە بايلانىستى بولادى.
2022 جىلعى 1 شىلدەدەگى جاعداي بويىنشا، مۇگەدەكتىگىنە بايلانىستى تولەنەتىن مەملەكەتتىك الەۋمەتتىك جاردەماقىنىڭ ورتاشا مولشەرى – 56 974 تەڭگە، اسىراۋشىدان ايىرىلۋ جاعدايى بويىنشا تولەنەتىن جاردەماقى – 55 137 تەڭگە.