مال جايۋعا شامامەن 15 ميلليون گەكتار جەر جەتىسپەيدى.
باس پروكۋراتۋرانىڭ مالىمەتىنشە، تەك سوڭعى 3 جىلدىڭ ىشىندە پروكۋرورلار 18 ميلليون گەكتار جەردىڭ بوس جاتقانىن جانە 3 ميلليون گەكتاردىڭ زاڭسىز جايىلىمعا بەرىلگەنىن انىقتاعان. ونىڭ 5 ميلليون گەكتارى مەملەكەتكە قايتارىلىپ، تاعى 4 ميلليون گەكتارى اينالىمعا تارتىلدى، دەپ حابارلايدى Almaty-akshamy.kz.
پروبلەمانىڭ تۋىنداۋىنا ۋچاسكەلەردى يگەرۋگە مۇمكىندىگى جوق ادامدار سەبەپ دەيدى. سونداي-اق جەرلەردى بەرۋ كەزىندەگى زاڭ بۇزۋشىلىقتار جانە ءتيىستى باقىلاۋدىڭ جاسالماعانى ءۇشىن 520 لاۋازىمدى تۇلعا، ونىڭ ىشىندە 42 ادام مەملەكەتتىك قىزمەتكە كىر كەلتىرگەنى ءۇشىن تارتىپتىك جاۋاپكەرشىلىككە تارتىلعان.
سالدارىنان ادال ەڭبەك ەتەتىن فەرمەرلەر مەن اۋىل حالقى جايىلىمداردى پايدالانۋ مۇمكىندىگىنەن ايىرىلىپ وتىر. جاعدايدى جاقسارتۋ ءۇشىن بيىل اۋىل شارۋاشىلىعى مينيسترلىگىمەن بىرلەسىپ، مەملەكەتكە قوسىمشا 5 ميلليون گەكتار جەردى قايتارۋ جوسپارلانۋدا. قۇزىرلى ورگان وسى باعىتتاعى جۇمىستار الداعى ۋاقىتتا دا جالعاساتىنىن مالىمدەدى.