الماتى قالاسىنىڭ باس سانيتارى قۇرباندىق شالۋدى ونلاين رەجيمدە جۇزەگە اسىرۋدىڭ ءتيىمدى ءارى ىڭعايلى ەكەنىن ايتتى. بۇل تۋرالى ول Facebook پاراقشاسىندا جازدى.
«قاسيەتتى قۇربان ايت – مۇسىلمان قاۋىم ءۇشىن ايتۋلى مەرەكە. بيىلعى ەپيدەميولوگيالىق احۋالعا بايلانىستى قۇرباندىق شالۋعا ونلاين تاپسىرىس بەرۋگە بولادى. مۇنىڭ بارلىعى حالىقتىڭ دەنساۋلىعىن ساقتاۋ ءۇشىن جاسالىپ جاتىر»، - دەيدى باس سانيتار.
ءوزى دە ەل قاتارلى www.qurban2021.kz سايتى ارقىلى ونلاين تاپسىرىس بەرىپ، قۇرباندىق شالعانىن ايتادى.
«مەن ءبارىن تۇسىنەمىن. ءوزىمنىڭ دە اعايىن-تۋىستارىم بار. ايت كۇندەرى اعايىن-تۋىس، دوس-جاراننىڭ باسىن قوسىپ، ارقا-جارقا بولىپ مەرەكەلەۋگە بولار ەدى. ءبىراق ەپيدەميولوگيالىق احۋال ۋشىعىپ تۇرعان كەزدە كارانتيننىڭ تالاپتارىنا باعىنۋعا ءتيىسپىز. سوندىقتان قۇربان ايتتا سانيتارلىق تالاپتاردى ەسكەرىپ، قالامىزدا ۆيرۋستىڭ ورشىمەۋى ءۇشىن جاۋاپتى بولىڭىزدار. قۇربان ايت قۇتتى بولسىن! جاراتقان قۇرباندىقتارىڭىز بەن دۇعالارىڭىزدى قابىل ەتسىن!» - دەپ جازدى جانداربەك بەكشين.