الماتىدا 2023 جىلعى تۋريستىك ماۋسىمدا «كولساي كولدەرى» ۇلتتىق پاركىندە نە وزگەرگەنى ايتىلدى
الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا «كولساي كولدەرى» مەملەكەتتىك ۇلتتىق تابيعي پاركىنىڭ باسشىلىعى مەن قىزمەتكەرلەرىنىڭ قاتىسۋىمەن باسپا ءسوز كونفەرەنسياسى ءوتتى، دەپ حابارلايدى almaty-akshamy.kz
قازىرگى ۋاقىتتا تومەنگى كولساي كولىندە تۋريستەر ءۇشىن جاعداي جاساۋ ماقساتىندا تۋريستىك مارشرۋتتى جايلاستىرۋ بويىنشا جۇمىستار جالعاسىپ جاتقانى، جاياۋ جانە اتپەن ءجۇرۋ مارشرۋتتارىنا بولىنگەن باسپالداق جولى ورناتىلاتىنى بەلگىلى بولدى.
«كولساي كولدەرى» ۇلتتىق تابيعي پاركى ديرەكتورىنىڭ ورىنباسارى حاميت احمەتوۆ اتاپ وتكەندەي، وتكەن جىلى تومەنگى كولساي كولى مەن قايىڭدى كولىنە رەكرەاسيالىق جۇكتەمەنى ازايتۋ ماقساتىندا ۇلتتىق پاركتىڭ ينفراقۇرىلىمىن دامىتۋدىڭ باس جوسپارى ازىرلەندى، وعان جەكە جانە زاڭدى تۇلعالاردى كونكۋرستىق نەگىزدە قىسقا مەرزىمدى پايدالانۋعا بەرۋ ءۇشىن ۇلتتىق پاركتىڭ ۋچاسكەلەرى ەنگىزىلدى.
2022 جىلدىڭ شىلدە جانە تامىز ايلارىندا ەكولوگيا، گەولوگيا جانە تابيعي رەسۋرستار ءمينيسترىنىڭ بۇيرىعىمەن بەكىتىلگەن ەرەجەلەرگە سايكەس تۋريستىك جانە رەكرەاسيالىق قىزمەتتى جۇزەگە اسىرۋ ءۇشىن ۇلتتىق پاركتىڭ جەر ۋچاسكەلەرىن ينۆەستورلارعا بەكىتۋ بويىنشا كونكۋرس وتكىزىلدى. سول جىلدىڭ قىركۇيەك ايىندا كونكۋرس جەڭىمپازدارىمەن قىسقا مەرزىمدى پايدالانۋ شارتتارى جاسالدى. جالپى كونكۋرسقا ساتى، قۇرمەت شاتقالىندا ورنالاسقان ۇلتتىق پاركتىڭ ۋچاسكەلەرى قويىلدى، سونداي-اق بىركەلكى رەكرەاسيالىق جۇكتەمەنى ءبولۋ ءۇشىن تومەنگى كولساي جانە قايىڭدى شاتقالدارىندا ورنالاسقان ۋچاسكەلەر قويىلدى.
سپيكەر، سونىمەن قاتار، ۇلتتىق ساياباقتاعى تۋريستىك ماۋسىم مامىر – قىركۇيەك ايلارىنا ەسەپتەلگەنىن حابارلادى. وسىعان بايلانىستى ينۆەستورلار تاراپىنان ۇلتتىق پاركتىڭ ينفراقۇرىلىمىن جاقسارتۋ جۇمىستارى بيىل، 2023 جىلى باستالدى.
«مىسالى، تومەنگى كولساي كولى شاتقالىندا جوعارعى اۆتوتۇراق اۋدانىنداعى ۋچاسكەلەردى پايدالانۋشىلار (ينۆەستورلار) ساۋدا-جارمەڭكە ايماعى، قوعامدىق تاماقتاندىرۋ پۋنكتتەرى، قازاق حالقىنىڭ سالت-داستۇرلەرى بار كيىز ۇيلەر ورناتىلىپ، سونداي-اق الماتى وبلىسىنىڭ ءتۋريزمدى باسقارۋ جەلىسى بويىنشا ۇلتتىق پارك ءۇشىن ورتالىق ازيالىق WWF باعدارلاماسىنىڭ گرانتتىق جوبا ەسەبىنەن قازاق اۋىلى سالىندى قوسىمشا جەكە دارەتحانالار مەن قوقىس جاشىكتەرى ورناتىلدى»، - دەدى حاميت احمەتوۆ.
قازىرگى ۋاقىتتا شەتەلدىك جانە جەرگىلىكتى تۋريستەردىڭ كولسايعا كەلىپ، قازاق داستۇرلەرى تۋرالى بىلۋگە، جەرگىلىكتى تاعامداردان ءدام تاتۋعا، ەتنو-اۋىلعا بارۋعا تاماشا مۇمكىندىگى بار.
سونىمەن قاتار، تومەنگى كولساي كولىنەن 12 شاقىرىم جەردە ساتى اۋىلى ورنالاسقان، وندا قوناق ۇيلەردىڭ قىزمەتتەرىن پايدالانۋعا، جەرگىلىكتى تۇرعىنداردان قازاق حالقىنىڭ داستۇرلەرىن بىلۋگە بولادى.