ادىلەت ۆيسە-مينيسترى الما مۇقانوۆانىڭ ايتۋىنشا، ءقازىر قىلمىستىق كودەكستە كوللەكتورلىق اگەنتتىك قىزمەتكەرىنىڭ ءوز وكىلەتتىكتەرىن اسىرا پايدالانعانى، قارىزدى ءوندىرىپ الۋدىڭ زاڭسىز ادىستەرىن قولدانعانى، قارجىلىق قىزمەتتەردى تۇتىنۋشىلاردىڭ قۇقىعىن بۇزعانى جانە تاعى باسقا ارەكەتتەر ءۇشىن جاۋاپكەرشىلىگىن كوزدەيتىن ارنايى باپ جوق.
«بۇل رەتتە قىلمىستىق كودەكستىڭ 214 جانە 223-باپتارى كوللەكتورلاردىڭ تەك كوللەكتورلىق قىزمەتپەن تىركەۋسىز اينالىسقانى ءۇشىن، سول سياقتى ەگەر بۇل ارەكەتتەر ازاماتقا، ۇيىمعا نەمەسە مەملەكەتكە ءىرى زالال كەلتىرسە نە ءىرى مولشەردە تابىس تابۋمەن ۇشتاسادى. سونداي-اق كوللەكتورلىق قىزمەتتىڭ قۇپياسىن جاريا ەتكەنى ءۇشىن عانا جاۋاپتىلىققا اكەپ سوعادى»، - دەپ سانايدى ادىلەت ۆيسە-مينيسترى.
ونىڭ ايتۋىنشا، كوللەكتورلىق اگەنتتىك قىزمەتكەرىنىڭ ءوز وكىلەتتىگىن قىزمەتىنىڭ مىندەتتەرىنە قايشى جانە ارتىقشىلىقتار الۋ ماقساتىندا پايدالانۋى قوعامعا ءقاۋىپتى ىس-ارەكەت رەتىندە باعالانۋى كەرەك.
وسىعان بايلانىستى مينيسترلىك كوللەكتورلىق اگەنتتىك قىزمەتكەرلەرىن ءوز وكىلەتتىكتەرىن تەرىس جانە اسىرا پايدالانعانى ءۇشىن قىلمىستىق جاۋاپكەرشىلىككە تارتۋدى ۇسىنىپ وتىر.
«بۇل شارا زاڭدىق ساۋاتسىزدىققا بايلانىستى كوللەكتورلىق اگەنتتىك قىزمەتكەرلەرىنىڭ قىسىمىنا جانە ايلا-شارعىسىنا ۇشىراۋى مۇمكىن ازاماتتاردىڭ قۇقىقتارى مەن مۇددەلەرىن قورعاۋدى قامتاماسىز ەتۋگە مۇمكىندىك بەرەدى»، - دەدى مۇقانوۆا.
ايتا كەتcەك، بۇگىن ماجىلىستە ادىلەت مينيسترلىگى كەيبىر زاڭنامالىق اكتىلەرگە قىلمىستىق، قىلمىستىق-پروسەستىك جانە قىلمىستىق-اتقارۋ كودەكستەرىن وڭتايلاندىرۋ ماسەلەلەرى بويىنشا وزگەرىستەر ەنگىزۋ تۋرالى زاڭ جوباسىن تانىستىردى.