بىلتىر ەكى ەل اراسىنداعى تاۋار اينالىمى 167،8 ميلليون اقش دوللارىن قۇراعان.
الماتى وبلىسىنىڭ اكىمى مارات سۇلتانعازييەۆ وزبەكستان رەسپۋبليكاسىنىڭ توتەنشە جانە وكىلەتتى ەلشىسى سايديكرام نيازحودجايەۆتى قابىلدادى، دەپ حابارلايدى Almaty-akshamy.kz
جيىن بارىسىندا اگروونەركاسىپتىك كەشەن، ساۋدا، كوشى-قون جانە جاستار ساياساتى سالاسىنداعى ءبىرقاتار ماسەلەلەر تالقىلاندى.
«ءبىز ءۇشىن مەملەكەت باسشىلارىنىڭ تاتۋ كورشىلىك پەن ءوزارا سىيلاستىققا ادالدىعىن كورسەتەتىن قارىم-قاتىناسى ۇلگى بولا الادى. ازىق-تۇلىك كلاستەرى ارقىلى وزبەك بيزنەسمەندەرىمەن ايماقتىق بيزنەس-فورۋم وتكىزۋگە دايىنبىز»، – دەدى مارات سۇلتانعازييەۆ.
ايماق باسشىسىنىڭ ايتۋىنشا، 2022 جىلى الماتى وبلىسى مەن وزبەكستان رەسپۋبليكاسى اراسىنداعى تاۋار اينالىمى 167،8 ميلليون اقش دوللارىن، ونىڭ ىشىندە ەكسپورت – 110،8 ميلليون اقش دوللارىن، يمپورت – 57،1 ميلليون اقش دوللارىن قۇراعان. بۇگىنگى تاڭدا وبلىستىڭ نەگىزگى ەكسپورتتاۋشىلارى ءسۇت ونىمدەرىن، كونديتەرلىك جانە ماكارون ونىمدەرىن شىعاراتىن تاماق ونەركاسىبى كاسىپورىندارى بولىپ تابىلادى.
اكىمنىڭ ايتۋىنشا، ەگەر ءبىزدىڭ وبلىس وزبەك ديقاندارىنان ەرتە شىققان كوكونىس پەن جەمىس-جيدەك ءونىمىن ساتىپ السا، كۇزگە قاراي وزبەكستان بىزدەن اۋىل شارۋاشىلىعى تاۋارلارىن الادى.
ءوز كەزەگىندە توتەنشە جانە وكىلەتتى ەلشى 2018 جىلى الماتى جانە تاشكەنت وبلىستارى اراسىندا كەلىسىمدەر بولعانىن جانە ءقازىر كەلىسىمدەردى جاڭارتۋ قاجەتتىلىگى تۋىنداپ وتىرعانىن، بۇل رەتتە وزبەكستاننىڭ باسقا وبلىستارىنىڭ اكىمدەرىمەن دە ءوڭىرارالىق قاتىناستاردى ودان ءارى دامىتۋ ءۇشىن وسىعان ۇقساس ءبىرقاتار ىسكەرلىك كەزدەسۋلەر وتكىزۋگە بولاتىنىن اتاپ ءوتتى.
وسىعان بايلانىستى ەلشى وزبەكستاندا وتەتىن بيزنەس-فورۋمعا الماتى وبلىسىنان دەلەگاسيا جىبەرۋدى ۇسىندى.
كەزدەسۋ بارىسىندا ەاەو مۇمكىندىگىن ەسكەرە وتىرىپ، وڭىرگە بيزنەستى تارتۋ فاكتورى بولىپ تابىلاتىن الماتى وبلىسىنىڭ كولىك-لوگيستيكالىق الەۋەتى تالقىلاندى.
سونىمەن قاتار، مارات سۇلتانعازييەۆ سايديكرام نيازقوجايەۆتى ءوڭىردى ودان ءارى دامىتۋ جوسپارلارىمەن تانىستىردى.
كەزدەسۋ سوڭىندا تاراپتار ساۋدا-ساتتىقتى ودان ءارى ارتتىرۋ ماقساتىندا بيزنەس-قوعامداستىقتىڭ كەزدەسۋىن وتكىزۋگە كەلىستى.