ءبىراق ءالى ناقتى شەشىم قابىلدانعان جوق.
ىشكى ىستەر ءمينيسترىنىڭ ورىنباسارى مارات قوجايەۆتىڭ ايتۋىنشا، قازاقستاندا كولىكتىڭ الدىڭعى اينەگىنە تونيروۆكا جاپسىرۋعا رۇقسات بەرىلۋى مۇمكىن، دەپ حابارلايدى Almaty-akshamy.kz
«ءيا، تونيروۆكاعا رۇقسات بەرۋ ماسەلەسى بۇرىننان بەرى كوتەرىلىپ كەلەدى. ءقازىر ءىىم وعان سالىنعان تىيىم تاريحىن زەرتتەپ جاتىر. ماسەلەنى دەپۋتاتتار دا كوتەرگەن»، – دەيدى ول.
قوجايەۆ كەدەن وداعىنىڭ رەگلامەنتىندە تونيروۆكا ماسەلەسى جازىلعانىن، وعان شەكتەۋ جۇرگىزۋشى، جولاۋشىنى تانۋعا كەدەرگى كەلتىرگەنى ءۇشىن قويىلعانىن ايتادى.
«بۇل قانشالىقتى مۇمكىن؟ الدە قانشالىقتى زيان؟ زەرتتەلۋ ۇستىندە. جاقىن ارادا ءبىز ساراپشىلىق قورىتىندىمىزدى بەرەمىز»، – دەدى ول.
ەلىمىزدە 2010 جىلى اۆتوكولىكتىڭ الدىڭعى اينەكتەرىن بوياپ، تونيروۆكا جاپسىرۋعا تىيىم سالىنعان. ءقازىر تونيروۆكانى الدىڭعى اينەككە زاڭسىز جاپسىرىپ العاندار اكىمشىلىك كودەكستىڭ 461-بابى 4-بولىگى بويىنشا جاۋاپكەرشىلىككە تارتىلادى.