پرەزيدەنتتىڭ ب ا ق سالاسى قىزمەتكەرلەرىن ماراپاتتاۋ راسىمىندە سويلەگەن سوزىنەن نەگىزگى ويلار:
– ءبىز ءاربىر ءسوزىمىزدى قوعامدى تۇزەۋگە جۇمساساق، بولاشاعىمىز دا باياندى بولارى حاق؛
– جۇرتتى ناشاقورلىق پەن قۇمارپازدىقتان، تۇرمىستىق زورلىق-زومبىلىقتان، ۆانداليزم مەن ىسىراپشىلدىقتان قورعاۋ – ورتاق مىندەت؛
– رەفورمالار، وزگەرىستەر ءالى دە جالعاسا بەرەدى. ەڭ باستىسى، بۇل وزگەرىستەر – حالىقتىڭ تاڭداۋى؛
– زاڭ جازالاۋ ءۇشىن ەمەس، ەڭ الدىمەن، قۇقىقتىق مادەنيەتتى قالىپتاستىرۋ ءۇشىن ماڭىزدى. وعان بۇكىل قوعام بولىپ اتسالىسۋ قاجەت؛
– دەپۋتات پەن جۋرناليست قىزمەتى بىرى-بىرىمەن تىعىز بايلانىسىپ جاتىر. ەكەۋى دە ەل مۇددەسىن قورعايدى. حالىق سەنىمىن ارقالاپ، وعان مۇلتىكسىز قىزمەت ەتەدى؛
– بۇگىندە وتاندىق جۋرناليستيكا مىقتى قوعامدىق ينستيتۋتقا، ناعىز ءتورتىنشى بيلىككە اينالدى. بۇل سالانىڭ وسىناۋ ماڭىزدى ىسكە قوسار ۇلەسى زور؛
– وتاندىق مەديا قوعامدا جوعارى ەكولوگيالىق سانا مەن تابيعاتتى ايالاۋ مادەنيەتىن قالىپتاستىرۋعا زور كومەگىن تيگىزە الادى؛
– ب ا ق وكىلدەرىنىڭ تاعى ءبىر ماڭىزدى ميسسياسى – ازاماتتارعا ەكونوميكانىڭ دامۋى تۋرالى جان-جاقتى جانە كەڭىنەن اقپارات بەرۋ. بۇل رەتتە اۋىز تولتىرىپ ايتاتىن دۇنيە جەتكىلىكتى؛
– جاعىمدى اقپارات لايىقتى دەڭگەيدە تارالماي جاتادى. جاقسىنى جاقسى دەپ ايتۋ كەرەك. ەل دامۋىنداعى وڭ وزگەرىستەرگە كوبىرەك نازار اۋدارۋ بۇقارالىق اقپارات قۇرالدارىنىڭ، اسىرەسە، مەملەكەتتىك باق-تىڭ مىندەتى دەپ سانايمىن؛
– ەلىمىز بيىل شىۇ-دان باسقا تاعى بەس حالىقارالىق قۇرىلىمعا ءتوراعالىق ەتىپ وتىر. بۇل – قازاق ديپلوماتياسىنىڭ تاريحىندا بۇرىن-سوڭدى بولماعان جەتىستىك؛
– قازاقستاندا الدەقاشان جاڭا ساياسي جاعداي قالىپتاستى. ونى ءسوز بوستاندىعىنان، اشىق باسەكەلەستىكتەن، بيلىك پەن قوعام اراسىنداعى كونسترۋكتيۆتى ديالوگتان، بۇكىل اقپاراتتىق رەسۋرستاردىڭ قول جەتىمدىلىگىنەن بايقاۋعا بولادى؛
– ءقازىر جاڭا مەديا ءداۋىرى باستالدى. بۇقارالىق اقپارات قۇرالدارى جاساندى ينتەللەكت تەحنولوگياسىن ءتيىمدى پايدالانىپ جاتىر. مۇنى شىن مانىندە جاڭاشىلدىق پەن جاسامپازدىقتىڭ كورىنىسى دەۋگە بولادى؛
– گازەت شىعارۋ جانە گازەت وقۋ ءۇردىسى ەشقاشان ۇزىلمەۋگە ءتيىس. وسى ساباقتاستىقتى ساقتاپ قالۋ كەرەك. بۇل – وركەنيەتتى ەلدەردىڭ بارلىعىندا قالىپتاسقان ءداستۇر.