سونىمەن بىرگە ول 7 جىلعا كولىك جۇرگىزۋ قۇقىعىنان ايىرىلدى
اقتوبە قالالىق ءماسليحاتىنىڭ دەپۋتاتى ەربول قاسىمعالي كولىكتى ماس كۇيىندە جۇرگىزگەنى ءۇشىن اكىمشىلىك جاۋاپقا تارتىلدى. كەيىن ول مانداتىنان باس تارتىپ، قالالىق اۋماقتىق سايلاۋ كوميسسياسىنا ارىز جازدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
اقتوبە قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىندا ەربول قاسىمعاليعا قاتىستى ءىس قارالدى. ءىس ماتەريالىنا سۇيەنسەك، كاسىپكەر ءارى قالالىق ءماسليحات دەپۋتاتى بيىل مامىر ايىندا Mercedes Benz اۆتوكولىگىن ماس كۇيىندە باسقارعان. ول قارعالى تۇرعىن ءۇي الابى قايداۋىل باتىر كوشەسىندە ۇستالدى. سوت وتىرىسى كەزىندە ەربول قاسىمعالي ءوز كىناسىن مويىندامادى. سونىمەن بىرگە مەديسينالىق ساراپتاما قورىتىندىسىمەن كەلىسپەدى. ءتىپتى، ەكىنشى رەت ساراپتامادان وتۋگە بولاتىنى تۋرالى ءتۇسىندىرىپ ايتپاعانىن العا تارتتى. ال دارىگەر ت.بەركۋتبايەۆ ونىڭ ءسوزىن جوققا شىعارىپ، شىن مانىندە جەڭىل ماساڭ كۇيدە بولعانىن ايتىپ بەردى.
اقتوبە قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتى اكىمشىلىك قۇقىقبۇزۋشىلىق كودەكستىڭ «جۇرگىزۋشىنىڭ كولىك قۇرالىن الكوگولدىك، ەسىرتكىلىك جانە ۋىتقۇمارلىق ماساڭ كۇيدە باسقارۋى، سول سياقتى كولىك قۇرالىن الكوگولدىك، ەسىرتكىلىك جانە ۋىتقۇمارلىق ماساڭ كۇيدەگى ادامنىڭ باسقارۋىنا بەرۋ» بابى بويىنشا ەربول قاسىمعاليدى كىنالى دەپ تانىپ، ونى 15 تاۋلىككە قاماۋ تۋرالى شەشىم شىعاردى. سونىمەن بىرگە ول 7 جىلعا كولىك جۇرگىزۋ قۇقىعىنان ايىرىلدى.
اقتوبە قالالىق اۋماقتىق سايلاۋ كوميسسياسىنىڭ ءتوراعاسى باعلانبەك ءقۇرماناليننىڭ ايتۋىنشا، ەربول قاسىمعالي دەپۋتاتتىق مانداتىنان باس تارتىپ، ارىز جازعان. ارىز قابىلداندى.