الماتىداعى ساۋدا-ويىن-ساۋىق ورتالىقتارىنىڭ ءبىرىنىڭ تۇراق الاڭىندا بلوگەردىڭ باسىنان وسىنداي جاعداي وتكەن.
الەۋمەتتىك جەلىلەردە كولىك ۇرلاۋدىڭ جاڭا سحەماسى تۋرالى ايتىلعان ۆيدەو كەڭىنەن تاراپ جاتىر.
بۇل سحەماعا بلوگەر تاپ بولعان. ونىڭ ايتۋىنشا، الاياقتار كولىكتىڭ كىلتىنەن شىعاتىن سيگنالدى بۇعاتتايدى، ال جۇرگىزۋشى كۇماندانباي، اۆتوكولىگىن قۇلىپتاندى دەپ ويلاپ، كەتىپ قالادى. ارادا بىرنەشە مينۋت وتكەندە كولىك ىشىندەگى زاتتار ۇرلانۋى نەمەسە كولىكتىڭ ءوزى جوق بولۋى مۇمكىن. مۇنداي جاعداي الماتىداعى ساۋدا-ويىن-ساۋىق ورتالىقتارىنىڭ ءبىرىنىڭ تۇراق الاڭىندا بلوگەردىڭ باسىنان وتكەن.
كىلت سيگنالى قالاي بۇعاتتالادى؟
IT-مامان سەرگەي دەميدوۆتىڭ ايتۋىنشا، بۇل قۇرىلعى ۇيالى بايلانىستى ءوشىرۋ ءۇشىن ءىس-شارالار نەمەسە ەمتيحاندار كەزىندە قولدانىلاتىن قۇرىلعىلارعا ۇقساس.
"دجاممەر – بۇل شاعىن قۇرىلعى، ول اۆتوكولىك كىلتىنەن شىعاتىن راديوسيگنالدى بۇعاتتايدى. ياعني، جۇرگىزۋشى "قۇلىپتاۋ" باتىرماسىن باسادى دا كولىك جابىلدى دەپ ويلايدى، ءبىراق سيگنال شىن مانىندە كولىككە جەتپەيدى"، – دەپ تۇسىندىرەدى ساراپشى.
ۇرلىق قالاي جاسالادى؟
سەناريي قاراپايىم:
جۇرگىزۋشى كولىكتى تۇراققا قويىپ، "قۇلىپتاۋ" باتىرماسىن باسادى؛
سول ساتتە ماڭايدا قۇرىلعى قوسۋلى تۇرادى، ول سيگنالدى بۇعاتتايدى؛
كولىك اشىق كۇيىندە قالادى، ال جۇرگىزۋشى مۇنى تەكسەرمەي، كەتىپ قالادى؛
قاسكوي كولىككە وپ-وڭاي وتىرىپ، ىشىندەگى زاتتاردى الىپ كەتەدى نەمەسە كولىكتى ايداپ اكەتەدى.
قالاي قورعانۋعا بولادى؟
ءىىم باسپا ءسوز قىزمەتى مالىمەتىنشە، مۇنداي جاعدايلاردىڭ الدىن الۋ ءۇشىن مىناداي قوسىمشا شارالاردى قابىلداۋ قاجەت:
ەلەكتروندىق جانە مەحانيكالىق ۇرلىققا قارسى قۇرىلعىلار مەن GPS-ماياكتاردى قامتيتىن زاماناۋي قورعاۋ كەشەندەرىن ورناتۋ؛
كولىك ىشىندە قۇجاتتار مەن باعالى زاتتاردى قالدىرماۋ.
ساراپشى سونداي-اق، تەك برەلوكقا سەنىپ قويماي، ەسىكتەردىڭ شىنىمەن جابىلعانىن قولمەن تەكسەرۋگە كەڭەس بەرەدى.