الماتى پروكۋراتۋراسى تاراتقان مالىمەتكە قاراعاندا، «باسپالار ءۇيىنىڭ» 100 پايىز اكسياسى سوت شەشىمىمەن مەملەكەت مەنشىگىنە قايتارىلعان، دەپ حابارلايدى aqshamnews.kz
– المالى اۋدانىنىڭ پروكۋراتۋراسى «باسپالار ءۇيى» («باسپا ءۇيى») اق اكسيالارىنىڭ 100 پايىزىن مەملەكەت مەنشىگىنە قايتارۋدى قامتاماسىز ەتتى. 2016 جىلى بۇرىن ق ر مادەنيەت جانە سپورت مينيسترلىگىنە تيەسىلى قۇنى 2،6 ملرد تەڭگە اكسيالاردى جەكە تۇلعا ارزانداتىلعان باعامەن زاڭسىز جەكەشەلەندىرىپ العان. مەملەكەتتىڭ مۇلىكتىك مۇددەلەرىن قورعاۋ ماقساتىندا پروكۋراتۋرا مامىلەنى جارامسىز دەپ تانۋ تۋرالى سوتقا تالاپ-ارىز بەردى. اپەللياسيالىق ساتىنىڭ قاۋلىسىمەن ءبىرىنشى ساتىداعى سوتتىڭ پروكۋراتۋرانىڭ تالاپ قويۋ تالاپتارىن قاناعاتتاندىرۋ تۋرالى شەشىمى وزگەرىسسىز قالدىرىلدى جانە زاڭدى كۇشىنە ەندى، – دەلىنگەن قالالىق پروكۋراتۋرا تاراتقان اقپاراتتا.
سۋ تەگىنگە ساتىلعان “باسپالار ءۇيى”
اۋديتورلىق ەسەپ قورىتىندىسىنا سايكەس 2016 جىلى «باسپالار ءۇيى» اق ەربول نازاروۆ، مايراش مىرزابەكوۆا جانە جانار راحمەتوۆا ەسىمدى ءۇش جەكە تۇلعانىڭ يەلىگىنە وتكەن. ەكى جىلدان كەيىن اكسيونەرلىك قوعام «Sanur Smart Invest» ج ش س بولىپ قايتا قۇرىلعان. ونىڭ 2018 جىلدان بەرگى جالعىز قۇرىلتايشىسى مايراش مىرزابەكوۆا.
اشىق دەرەككوزدەردەگى اقپاراتقا قاراعاندا قۇنى 2،6 ميلليارد تەڭگە بولاتىن «باسپالار ءۇيى» نەبارى 343 ميلليون تەڭگەگە ساتىلعان. ول ۋاقىتتا مادەنيەت جانە سپورت مينيسترىلىگىن ارىستانبەك مۇحامەدي ۇلى باسقارعان.