ەندى ءوتىنىش بەرۋ كەزىندە تالاپكەر جاتاقحانا نەمەسە تەگىن تاماقتانۋ قاجەتتىلىگىن بىردەن كورسەتە الادى، دەپ حابارلايدى aqshamnews.kz
بيىل بۇل قىزمەت جاڭارتىلدى. ەندى ءوتىنىش بەرۋ كەزىندە تالاپكەر جاتاقحانا نەمەسە تەگىن تاماقتانۋ قاجەتتىلىگىن بىردەن كورسەتە الادى. سونداي-اق اسكەري قىزمەتتى وتەگەنى تۋرالى قۇجاتتى دا تىركەۋگە بولادى.
"ماڭىزدى جاڭاشىلدىقتاردىڭ ءبىرى – وقۋ ورنىن تاڭداۋ كەزىندە سۇزگىلەۋ مەحانيزمىنىڭ ەنگىزىلۋى. جۇيە تالاپكەر تاڭداعان پارامەترلەر بويىنشا وقۋ ايماعى، وقىتۋ ءتىلى، باعىت جانە ماماندىقتاردىڭ ءتىزىمىن اۆتوماتتى تۇردە قالىپتاستىرادى. ال "سەرپىن" باعدارلاماسىنا قاتىساتىن وڭىرلەردەگى اۋىل مەكتەپتەرىنىڭ تۇلەكتەرى ءۇشىن ونداي مەحانيزم بولەك قاراستىرىلعان"، - دەلىنگەن رەسمي حابارلامادا.
ءار تالاپكەر ءوتىنىشتى ءبىر رەت قانا بەرە الادى. ءتورت ءتۇرلى كوللەدج بەن ءتورت ماماندىق تاڭداۋ مۇمكىندىگى بار. قۇجاتتاردىڭ جالپى كولەمى 5 مەگابايتتان اسپاۋعا ءتيىس.
ءوتىنىش بەرۋ ءتارتىبى:
eGov.kz پورتالىندا اۆتوريزاسيادان ءوتۋ؛
"ءبىلىم" بولىمىنەن "كوللەدجدەر" ساناتىن تاڭداۋ؛
"تەحنيكالىق جانە كاسىپتىك، ورتا بىلىمنەن كەيىنگى ءبىلىم بەرۋ ۇيىمدارىنا قۇجاتتار قابىلداۋ" قىزمەتىن تاڭداۋ؛
بارلىق قاجەتتى جولداردى تولتىرىپ، قۇجاتتاردى جۇكتەۋ؛
قىزمەتتى قولجەتىمدى ادىستەردىڭ بىرىمەن راستاۋ.
ال قىزمەت ناتيجەسى پايدالانۋشىنىڭ جەكە كابينەتىندە "قىزمەتتەردى الۋ تاريحى" بولىمىندە قولجەتىمدى بولادى. قىزمەت كورسەتۋ مەرزىمى – 3–5 جۇمىس كۇنى.