كولىك قوزعالىسى ۋاقىتشا جابىلادى

الماتىدا بايزاقوۆ كوشەسىنىڭ ۋچاسكەسىندە جوندەۋ جۇمىسىنا قاتىستى كولىك قوزعالىسى ۋاقىتشا جابىلادى

بايزاقوۆ كوشەسىنىڭ گوگول كوشەسىنەن رايىمبەك داڭعىلىنا دەيىنگى ۋچاسكەسىندە ورتاشا جوندەۋ جۇمىستارىنىڭ جۇرگىزىلۋىنە بايلانىستى 21 قاراشا كۇنى ساع.23:00-دەن 22 قاراشا ساع.06:00-گە دەيىن كولىك قوزعالىسى جابىلادى.

«Dauren Build» ج ش س مەردىگەر ۇيىمى 2023 جىلدىڭ تامىزىندا بايزاقوۆ كوشەسىنىڭ گوگول كوشەسىنەن رايىمبەك داڭعىلىنا دەيىنگى ۋچاسكەسىندە جول جابىندىسىنىڭ بەتكى قاباتىن الىپ تاستاعانىمەن، جاڭا جول جابىندىسىنىڭ جوعارى قاباتىن توسەمەگەن. 
جول جوندەۋ جۇمىستارى تاپسىرىس بەرۋشىنىڭ كەلىسىمىنسىز 20 كۇننەن استام توقتاتىلعان. 

تاپسىرىس بەرۋشى تاراپىنان جۇمىستاردى جالعاستىرۋ تۋرالى بىرنەشە ەسكەرتۋ جىبەرىلگەن بولاتىن. الايدا مەردىگەر ۇيىم ءوز جۇمىسىن تەك قازان ايىندا جالعاستىرا باستادى. سونىمەن قاتار تەحنيكالىق قاداعالاۋ قىزمەتى جۇمىس ساپاسىنا قاتىستى ءبىرقاتار ەسكەرتۋلەر جاساعان. ءبىراق اقاۋلار كۇنى بۇگىنگە دەيىن تۇزەتىلمەگەن.

سوندىقتان «Dauren Build» جشس- مەن جاسالعان كەلىسىم شارت بۇزىلىپ، ماتەريالدار سوتقا جىبەرىلدى. 

جول قوزعالىسى قاۋىپسىزدىگىن قامتاماسىز ەتۋ ماقساتىندا ورتاشا جوندەۋ جۇمىستارىن بيزنەستىڭ الەۋمەتتىك جاۋاپكەرشىلىگى اياسىندا بىرنەشە مەردىگەر ۇيىم بىرىگىپ جۇرگىزەتىن بولادى. 

الماتىنىڭ قالالىق موبيلدىلىك باسقارماسى