بەيبىت شۇمەنوۆكە قاتىستى تەرگەۋ توقتاپ تۇر

ىشكى ىستەر مينيسترلىگى بەيبىت شۇمەنوۆتىڭ ءالى ىزدەۋدە ەكەنىن مالىمدەدى.

كۇدىكتىگە قاتىستى سوتقا دەيىنگى تەرگەۋ مەرزىمى ق ر قىلمىستىق-پروسەستىك كودەكستىڭ 45-بابى، 7-تارماعى، 3-تارماقشاسى نەگىزىندە توقتاپ تۇر، دەپ حابارلايدى اlmaty-akshamy.kz. 

"اتالعان فاكتى نەگىزىندە بيىل شىلدە ايىندا استانا قالاسى ەسىل اۋدانى پوليسيا باسقارماسى قىلمىستىق كودەكستىڭ 293-بابى، 1 ءبولىمى بويىنشا سوتقا دەيىنگى تەرگەۋ جۇرگىزدى. شىلدە ايىنىڭ 12 كۇنى اتالعان ادامدى كۇدىكتى دەپ تانىپ، ونىڭ ىس-ارەكەتىن ق ر قىلمىستىق كودەكسىنىڭ 293-بابى، 2ء-بولىم، 2-تارماقشاسى بويىنشا باعالاۋ جونىندە ارنايى قاۋلى شىعارىلدى"، – دەپ جازىلعان Kazinform اگەنتتىگىنىڭ رەسمي ساۋالىنا بەرىلگەن جاۋاپتا.

كەيىن استانا قالاسى مامانداندىرىلعان اۋدانارالىق سوتى كۇدىكتىنى قاماۋعا الۋ شاراسىن سانكسيالادى.
شىلدە ايىنىڭ سوڭىندا كۇدىكتىگە حالىقارالىق ىزدەۋ جاريالاندى.

"28 تامىزدا كۇدىكتىگە قاتىستى سوتقا دەيىنگى تەرگەۋ مەرزىمى ق ر قىلمىستىق-پروسەستىك كودەكستىڭ 45-بابى، 7-تارماعى، 3-تارماقشاسى نەگىزىندە توقتاتىلدى"، – دەدى مينيسترلىك.

ودان بولەك، ءىىم باسپا ءسوز قىزمەتىنىڭ قىزمەتكەرى بەيبىت شۇمەنوۆتى ىزدەۋ توقتاتىلعان جوق ەكەندىگىن، ونى ۇستاعانعا دەيىن ءىس جۇرگىزۋ توقتاپ تۇرعانىن ايتتى.

ەسكە سالساق، بيىل شىلدەدە قازاقستاندىق بوكسشى بەيبىت شۇمەنوۆ كوپشىلىك ورىندا بالاسى بار ەر ادامعا جۇدىرىق الا جۇگىرگەن. 
سودان سوڭ بەيبىت شۇمەنوۆ ءدامحاناداعى وقيعانىڭ قالاي بولعانىن ايتىپ بەردى. كەيىن وعان حالىقارالىق ىزدەۋ جاريالاندى.