ۇكىمەت وتىرىسىندا كولىك ۆيسە-مينيسترى ماقسات قالياقپاروۆ قازاقستاننىڭ كولىك سالاسىنىڭ ءوسۋىن قامتاماسىز ەتۋ ءۇشىن قابىلدانىپ جاتقان شارالار تۋرالى باياندادى، دەپ حابارلايدى aqshamnews.kz
بيىل جول قۇرىلىسى جانە كولىك ينفراقۇرىلىمىن جاڭارتۋ سالاسىندا ايتارلىقتاي جۇمىستار اتقارىلدى. ماسەلەن، جول-قۇرىلىس جۇمىستارىمەن 12 مىڭ شاقىرىم جول قامتىلدى. ءتورت نەگىزگى اۆتوجول ءدالىزىن: قاراعاندى–الماتى (879 كم)، تالدىقورعان–وسكەمەن (768 كم)، اقتوبە–قاندىاعاش (96 كم)، جانە اتىراۋ–استراحان (212 كم) رەكونسترۋكسيالاۋ اياقتالدى. بۇدان باسقا، حالىقارالىق تاسىمالداۋ سالاسىندا رەفورمالار: شەتەلدىك رۇقسات بلانكىلەرىنىڭ ەلەكتروندىق فورماتىنا كوشۋ جۇرگىزىلدى. سەگىز كۇننەن ءبىر كۇنگە دەيىنگى مەرزىمدەردى وڭتايلاندىرۋ، سونداي-اق ءىرى مونوپوليستەردىڭ باسىم قۇقىعى توقتاتىلىپ، وزبەكستانمەن رەيستەر سانىن 5 مىڭنان 33 مىڭعا دەيىن، قىتايمەن – 50 مىڭنان 230 مىڭعا دەيىن ۇلعايتۋعا مۇمكىندىك بەردى.
قوعامدىق كولىك پاركىنىڭ سوڭعى 2 جىلدا 3 267 اۆتوبۋسقا جاڭارتىلۋى تەحنيكانىڭ توزۋىنىڭ 40%-دان 30%-عا دەيىن تومەندەۋىنە اكەلدى.
سونىمەن قاتار 2024 جىلى 1 401 شاقىرىم تەمىرجول جەلىسى جوندەۋدەن وتكىزىلىپ، 185 لوكوموتيۆ، 1،6 مىڭنان اسا جۇك جانە 143 جولاۋشىلار ۆاگونى ساتىپ الىندى. اۆياسيا سالاسىندا قازاقستاندىق كومپانيالار 10 ۇشاق ساتىپ الىپ، تاسىمالداۋ سىيىمدىلىعىن 7%-عا ارتتىرۋعا ىقپال ەتتى. حالىقارالىق اۋە مارشرۋتتارىنىڭ جەلىسى 22 باعىت بويىنشا كەڭەيتىلدى. الماتى مەن قىزىلوردا اۋەجايلارىندا جاڭا تەرمينالداردىڭ قۇرىلىسى اياقتالدى، شىمكەنتتە جۇمىس اياقتالۋ ساتىسىندا.
وسىعان قوسا، تحكب ءدالىزىنىڭ وتكىزۋ مۇمكىندىگىن ۇلعايتۋ بويىنشا دا جۇمىستار جۇرگىزىلىپ جاتىر. بيىلعى 11 ايدا وسى باعىت ارقىلى تاسىمال كولەمى 63%-عا ءوسىپ، 4 ملن 100 مىڭ تونناعا جەتتى. كونتەينەرلىك تاسىمالدار 2،6 ەسەگە، ونىڭ ىشىندە قىتايدان كەلەتىن ترانزيت 26 ەسەگە ارتقان. جالپى العاندا، كولىك قىزمەتتەرىنىڭ كولەمى قارجىلاي تۇردە 13%-عا ءوسىپ، 7،7 ترلن تەڭگەگە جەتتى.
ونىڭ ىشىندە جۇك تاسىمالىنىڭ ءوسۋى بايقالادى:
اۆتوموبيل كولىگىمەن 19،8%-عا؛
جۇكتەردى قۇبىر كولىگىمەن تاسىمالداۋ بويىنشا 7،5%-عا؛
تەمىرجول كولىگىمەن 2،6%-عا؛
ىشكى تاسىمالدار 8،8%-عا؛
ترانزيتتىك جۇك تاسىمالداۋ كولەمى 6،1%-عا؛
كونتەينەرلىك ترانزيت 8،7%-عا ارتتى.