كولىك ءمينيسترى مارات قارابايەۆ قۇرتى اۋىلىنان استانا قالاسىنا دەيىن «الماتى-ەكاتەرينبۋرگ» رەسپۋبليكالىق ماڭىزى بار جولدى اۆتوكولىكپەن ءجۇرىپ ءوتتى.
جۇمىس ساپارى بارىسىندا مينيستر «قۇرتى-بۋرىلبايتال»، «بالقاش-بۋرىلبايتال»، «قاراعاندى-بالقاش» ۋچاسكەلەرىن قايتا جاڭارتۋ جۇمىستارىنىڭ بارىسىن تەكسەرىپ، قۇرىلىس مەردىگەرلەرىمەن جيىندار وتكىزدى، دەپ حابارلايدى Almaty-akshamy.kz Elorda.info-عا سىلتەمە جاساپ.
م.قارابايەۆ قاسىنا كولىك كوميتەتىنىڭ باسشىسى ت.ابدۋللين جانە «قازاۆتوجول» ۇك» اق باسقارما ءتوراعاسى م.قاسىمبايەۆتى ەرتىپ، «قۇرتى-بۋرىلبايتال» ۋچاسكەسىندەگى جۇمىستاردىڭ بارىسىمەن تانىستى. 2017 جىلى باستالعان جوبانى Todini Construzioni Generali، سپ «سينەميداسستروي»، «سينوحايدرو» جانە KLV Inşaat Anonim Şirket كومپانيالارى جۇزەگە اسىرۋدا. «قۇرتى-بۋرىلبايتال» جوباسىنىڭ جالپى ۇزىندىعى 228 شاقىرىمدى قۇرايدى. جاڭا اسفالت بويىنشا قوزعالىس 192 شاقىرىم اشىق، ال جىلدىڭ سوڭىنا دەيىن ءى-ب ساناتتى جول سەگمەنتىنىڭ بۇكىل ۇزىندىعى بويىنشا كولىك قوزعالىسىن قامتاماسىز ەتۋ جوسپارلانۋدا.
مينيستر «قاراعاندى-بالقاش» جولىنىڭ ۋچاسكەسىن تەكسەردى. وندا CITIC Construction Co جانە «سينەميداسستروي» سپ كومپانيالارى باستالعان جۇمىستاردى اياقتاپ جاتىر. قوزعالىس 4 جولاقتى جولدىڭ 363 شاقىرىمىنىڭ 313-ىندە اشىق.
ايتا كەتەرلىگى، قۇرىلىس نىساندارىنا بارعان كەزدە مارات قارابايەۆ مەردىگەر ۇيىمدارمەن كەڭەس وتكىزدى. ولارعا شارتتىق مىندەتتەمەلەردى ساپالى ورىنداۋ تاپسىرىلدى.
«ەگەر كورسەتىلگەن مەرزىمدەردەن ارتتا قالعان جوبالارىڭىز بولسا، بۇل تۋرالى بىردەن ايتىڭىزدار. ءبىز دە، جولدا جۇرەتىن جولاۋشىلار دا شىندىقتى ءبىلۋى كەرەك. الايدا، بۇل سەبەپ-سالدارىن تۇسىندىردىك دەپ، ارى قاراي جايباراقات ءجۇرۋدى بىلدىرمەيدى. ەگەر سىزدەر قۇرىلىس مەرزىمدەرىن سوزا بەرسەڭىزدەر، ءبىز زاڭ اياسىندا ءتيىستى شارالار قولدانامىز، ءتىپتى شارتتا كورسەتىلگەندەي ايىپپۇل سالامىز. بارىنە دايىن بولىڭىزدار»، - دەدى مينيستر جول بويىندا وتكىزىلگەن جۇمىس جينالىستارىنىڭ بىرىندە.