ەلىمىزدە سوڭعى كەزدەرى حيدجاب كيۋ ماسەلەسى ۋشىعىپ تۇر. ەلدەگى ايتىس، تالاس-تارتىس، پىكىرتالاستاردىڭ دەنى وسىنىڭ توڭىرەگىندە، دەپ حابارلايدى Almaty-akshamy.kz.
بۇعان دەيىن، مادەنيەت جانە اقپارات ءمينيسترى ايدا بالايەۆانىڭ مەكتەپتە حيدجاب كيۋ ماسەلەسىنە قاتىستى پىكىرىن بەرگەن ەدىك.
ق ر پرەزيدەنت جانىنداعى ۇلتتىق قۇرىلتاي مۇشەسى، بەلگىلى زاڭگەر ايگۇل ورىنبەك تە حيدجاب ماسەلەسىن كوتەرىپ، جازبا جاريالادى.
«حيدجابقا» ناقتى ءارى تۇبەگەيلى توسقاۋىل قوياتىن زاڭ جوق!
قازاقستان – قۇقىقتىق ءارى زايىرلى مەملەكەت. سوندىقتان، قازاقستاننىڭ ساياسي دامۋى مەن ەكونوميكاسىنا، يدەولوگياسىنا تىكەلەي كەدەرگى كەرى ىقپالى بار، بارىنەن بۇرىن ءبۇتىن ءبىر مەملەكەتتىڭ ساناسىن ۋلاپ قۇردىمعا باستايتىن – تەرىس اعىمدارعا تۇبەگەيلى تىيىم سالاتىن ۋاقىت جەتتى!
ءبىزدىڭ ەل، ساناسى ۋلانعانداردان از جاپا شەككەن جوق. سالعان جاراسى مەن جاراقاتى دا جازىلعان جوق. كەرىسىنشە، كۇن ساناپ ۋشىعىپ: سانامىزدى ۋلاپ، جاعامىزدى جىرتىپ، بالتىرىمىزدى تىستەلەپ، باسىمىزدى كورگە تىعىپ بارادى...
سيرياعا جىلدار بويى اعىلعان بوزداقتارىمىز، قايتىپ ورالماي قالعان قانداستارىمىز كوپ. ولاردى كەرى اكەلۋ مەن وي-كوزقاراسىن قالىپتى جاعدايعا وزگەرتۋگە جۇمسالعان قارجى دا از ەمەس. سول ميلليونداعان اقشا مەن يدەولوگيالىق جوبالار ماردىمدى ناتيجە بەرمەگەنىن دە كورىپ وتىرمىز.
نەگە ماقساتتى دەپ بولىنگەن قارجىنىڭ سۇراۋى جوق؟
بار بولسا، اتويلاتىپ باستالعان - جارناماسى جەر جارعان سول جوبالاردىڭ ناقتى جۇمىسى مەن ونىڭ ناتيجەسى نەگە كورىنبەيدى؟
سونشاما ميلليونداعان قارجى قايدا كەتتى؟ جۇمىس جاسالسا، ول قايدا؟ نەگە جوق؟
الدە بۇل بىرەۋدىڭ پايدا كوزى - «كولەگەيلى» بيزنەسى ما؟
ەگەر، راسىمەن دە ءدال وسى قوماقتى قارجىلار ماقساتتى جۇمسالسا، ەلىمىزدىڭ يدەولوگياسى مەن ىشكى احالى ءدال بۇلاي اقساپ، ىشتەن «ءىرىپ» جاتپاس ەدى..!
قازاقستانداعى قازاق ۇلتىنىڭ ءوزى - ءۇي ىشىنەن ءۇي تىگىپ، وتانىن ساتىپ، تۋعان ءتىلى مەن دىنىنەن بەزىپ، از ۋاقىتتا ءدىني نانىم-سەنىمدەرىن وزگەرتپەس ەدى... ءوزارا ەكىگە ءتىپتى ءۇش-تورت توبىرعا ءبولىنىپ، قان توگىسىپ قاستاسپاس ەدى!
تۋعان اناسىن تانىماي، ايەلزاتىن قورلاپ، تالاق ايتىپ، ۇلت نامىسىن تاپتاماس ەدى...! بارىنەن بۇرىن، بەيبىت كۇندە كوتەرىلىستەر كوبەيىپ، ادام شىعىنى دا بولماس ەدى...!
مىناۋ تاراز، اقتوبەدەگى، جالپى ەل اراسىنداعى ىشكى «ىرىتكى» سالۋلار، تەرىس اعىمعا بەت بۇرۋدىڭ سالدارلارىنان قالىڭ ەل قارا جامىلدىق.
بۇل جانتۇرشىگەرلىك قانتوگىستە قانشاما بەيبىت تۇرعىندار، ءتارتىپ ساقشىلارى مەن انتىنا ادالدىق تانىتقان اپتال ازاماتتارىمىز جازىقسىز اجال قۇشتى... بۇل ەلىمىز ءۇشىن – ورنى تولماس اۋىر قاسىرەت.
وسى رەتتە، اششى بولسا اقيقاتتى ايتقىم كەلەدى، جۇيەدەگى شىندىقتى كوتەرگىم كەلەدى: ءبىزدىڭ ەلدە جات اعىمدارمەن، ەكترەميزم جانە تەرروريزممەن كۇرەسەتىن اتى دارداي ۇلتتىق قاۋىپسىزدىك كوميتەتى بار. ءبۇتىر ءبىر ۆەدومستۆوداعى قىزمەتكەرلەردى قوسپاعاندا، ياعني ودان بولەك ىشكى ىستەر مينيسترلىگىندە ەكسترەميزممەن كۇرەس دەگەن ارنايى قۇرىلعان دەپارتامەنتتەر مەن باسقارمالار دا بار. وندا جۇمىس جاسايتىن جاساقتار مەن جۇزدەگەن قىزمەتكەرلەر تاعى بار. ءبىراق، ولاردىڭ جۇمىلا اتقارعان ياعني كوزگە كورىنەتىن جۇمىستارى جوق! بار بولسا دا، ناتيجەسى جوق! بۇعان اتالعان قۇرىلىمدى دا، ولاردىڭ قىزمەتكەرلەرىن دە كىنالاي المايمىن. سەبەبى، ءبىزدىڭ مەملەكەتتتە ءدال وسى تەرروريزم مەن ەكسترميزم، جات اعىمدار، «نيكاب» پەن «حيدجابقا» ناقتى ءارى تۇبەگەيلى توسقاۋىل قوياتىن زاڭ جوق!
سول سەبەپتى، قازاقستان – قاۋىپسىزدىگىنىڭ كەپىلى بولار ناق قادام جاساپ: ساياسي تۇرعىدا ءارى سەنىمدى تۇردە قاۋىپسىزدىكتى قامتاماسىز ەتەتىن شۇعىل تۇردە زاڭدى قابىلداۋ قاجەت»! - دەدى زاڭگەر جازباسىندا.