اعاش وتىرعىزۋ ماۋسىمى مامىر ايىنىڭ سوڭىنا دەيىن جالعاسادى
الماتىدا جىل سايىنعى جاپىراقتى جانە قىلقىن جاپىراقتى اعاشتاردى وتىرعىزۋ ماۋسىمى باستالدى. 2023 جىلدىڭ كوكتەمىندە 10 مىڭنان استام، ونىڭ ىشىندە «جاسىل اۋلا» ناۋقانى اياسىندا تۇرعىندارمەن بىرلەسە وتىرىپ، اعاش وتىرعىزۋ جوسپارلانعان، دەپ حابارليدى almaty-akshamy.kz
قالا تۇرعىندارىنا بارلىعى 2638 اعاش كوشەتتەرى بەرىلەدى. شەگىرشىن، ءساناعاش، شاعان مەن قايىڭنىڭ كوشەتتەرى 1،2 جانە 8،9 ساۋىرگە جوسپارلانعان. ناۋقان قاتىسۋشىلارى وتىرعىزىلعان اعاشتاردى الداعى ءۇش جىل بويى كۇتىپ-باپتاۋعا مىندەتتەلگەن.
جالپى، اعاش وتىرعىزۋ ماۋسىمى مامىر ايىنىڭ سوڭىنا دەيىن جالعاسادى. نەگىزگى اعاش وتىرعىزۋ ناۋقانى كۇز كەزىندە جۇزەگە اسىرىلادى، بيىل كۇزدە 300 مىڭنان استام اعاش وتىرعىزۋ جوسپارلانعان. كوپشىلىك اعاشتار الاتاۋ جانە ناۋرىزباي اۋداندارىندا وتىرعىزىلاتىن بولادى.