ەلىمىزدە 2 ميلليارد اعاش وتىرعىزۋ ناۋقانى قارقىندى جۇرگىزىلۋدە
ەلىمىزدە بەس جىل ىشىندە (2021-2025 ج.ج.) 2 ملرد اعاش وتىرعىزۋ جۇمىسى جوسپارعا ساي ءجۇرىپ جاتىر. بۇل تۋرالى ق ر ەكولوگيا، گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتى ءتوراعاسىنىڭ ورىنباسارى ەرلان قۇتپانبايەۆ ءمالىم ەتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
«مەملەكەت باسشىسىنىڭ تاپسىرماسىنا سايكەس، وتكەن جىلدان باستاپ ەل اۋماعىندا 2 ملرد اعاش وتىرعىزۋ ناۋقانى باستالدى. جوبا باستالعالى ەلىمىز بويىنشا 200 ملن استام اعاش كوشەتى وتىرعىزىلدى. ال، بيىل كوكتەمدە 100 ملن جۋىق كوشەت ەگىلدى. جوسپار بويىنشا وسى كوكتەمدە 108 ملن كوشەت وتىرعىزۋىمىز كەرەك. الداعى 10 كۇننىڭ ىشىندە قالعان 8 ملن اعاشتى وتىرعىزامىز. قالعانى جوسپارعا سايكەس الداعى كۇزدە ىسكە اسىرىلادى. سونىمەن قاتار، وتىرعىزىلعان اعاش كوشەتتەرىنىڭ ودان ءارى ءوسىپ كەتۋى ءبىزدىڭ باقىلاۋىمىزدا. ول ءۇشىن نورماتيۆتىك-قۇقىقتىق اكت قاراستىرىلعان. باقىلاۋ كۇز مەزگىلىندە جۇرەدى. الدىمەن ورمانشى ماماندار قاداعالايدى، سودان سوڭ باقىلاۋ ءبولىمىنىڭ وكىلدەرى تەكسەرەدى»، - دەدى ەرلان قۇتپانبايەۆ.
ونىڭ ايتۋىنشا، ەل اۋماعىندا بىلتىر وتىرعىزىلعان اعاش كوشەتتەرىنىڭ 70 پايىزى تىرشىلىگىن جالعاستىردى. سونداي-اق، اعاش كوشەتىن وتىرعىزۋ ناۋقانى ەلىمىز بويىنشا كوكتەم جانە كۇزدە جۇرەدى.
«2 ملرد ءتۇپ اعاشتىڭ ىشىندە 700 ملن جۋىعى سەكسەۋىل، 550 ملن استامى قاراعاي، ودان بولەك قايىڭ، تەرەك تاعى سول سياقتى اعاش تۇرلەرى بار. بارلىق اعاش كوشەتتەرى وتاندىق، اتاپ ايتقاندا شقو مەن پاۆلودار وبلىسىنا تيەسىلى. ءبىز ءقازىر اقمولا وبلىسىنا قاراستى «جاسىل ايماق» ورمان قورى شارۋاشىلىعىنىڭ اۋماعىندا تۇرمىز. بۇل جەردە بيىل كوكتەمدە 5 ملن استام اعاش كوشەتى وتىرعىزىلدى. جالپى، اعاش ەگۋ پروسەسى 2 ادىسپەن ورىندالىپ جاتىر. ءبىرى - تۇقىم سەبۋ ارقىلى، ەكىنشى جولى - كوشەت تۇرىندە وتىرعىزۋ. اعاش وتىرعىزۋ جۇمىسى جوسپارعا ساي جۇزەگە اسىپ جاتىر»، - دەيدى ول.
ەسكە سالا كەتەيىك، مەملەكەت باسشىسىنىڭ تاپسىرماسىنا سايكەس قازاقستاندا 2021 جىلدان باستاپ 5 جىل كولەمىندە ورمان قورىنا 2 ملرد ءتۇپ اعاش ەگىلەدى.