دانيار قوبىلاندين بۇكىلالەمدىك كوكپار قاۋىمداستىعىنىڭ پرەزيدەنتى بولىپ سايلاندى.
دۇنيەجۇزىلىك كوكپار قاۋىمداستىعىنا دانيار قوبىلاندين باسشى بولدى. مۇنداي شەشىمدى بىرلەستىك مۇشەلەرى كەزەكتى كونفەرەنسيادا اشىق داۋىس بەرۋ ارقىلى قابىلدادى، دەپ حابارلايدى almaty-akshamy.kz
دانيار جاڭاباي ۇلى 1984 جىلى دۇنيەگە كەلگەن. ق ر پرەزيدەنتى جانىنداعى مەملەكەتتىك باسقارۋ اكادەمياسىنىڭ ماگيسترى، پرەزيدەنت اكىمشىلىگى مەن كولىك مينيسترلىگىندە جاۋاپتى قىزمەتتەر اتقارعان. 2013 جىلدان بەرى ەلىمىزدەگى بەدەلدى كاسىپكەرلەردىڭ ءبىرى بولىپ سانالادى.
دەنە شىنىقتىرۋ جانە سپورت سالاسىندا مول تاجىريبەسى بار. 2018-2022 جىلدار ارالىعىندا «اۋدارىسپاق» فەدەراسياسىنىڭ پرەزيدەنتى بولىپ، ناتيجەلى ەڭبەك ەتتى.
«ۇلكەن سەنىم ءۇشىن بارشاڭىزعا العىس بىلدىرگىم كەلەدى. مەن قاۋىمداستىقتىڭ قىزمەتىن جوعارى دەڭگەيگە كوتەرۋ ءۇشىن بارلىق كۇشىمدى سالىپ، مۇمكىندىكتەردى پايدالانامىن. 2024 جىلى قازاقستاننىڭ استاناسى استانا قالاسىندا دۇنيەجۇزىلىك كوشپەندىلەر ويىنى وتەدى. ياعني، موينىمىزدا ۇلكەن جاۋاپكەرشىلىك تۇر. سونداي-اق، الدىمىزدا ۇلتتىق جانە ءداستۇرلى ات سپورتى ويىندارىن ودان ءارى دامىتۋ بويىنشا ۇلكەن مىندەتتەر بار. ءيا، ءتۇرلى ەلدەردە ويىننىڭ اتاۋى ءارتۇرلى، ءبىراق ويىن ەرەجەسى بىردەي» - دەدى قوبىلاندين.
سونداي-اق، فورۋمدا ۆەنگريانىڭ كوكپار قاۋىمداستىعىن (كوبوري) جانە پاكىستاننىڭ بۋزكاشي فەدەراسياسىن دۇنيەجۇزىلىك كوكپار قاۋىمداستىعىنىڭ قۇرامىنا قوسۋ تۋرالى شەشىم قابىلداندى.
ايتا كەتەيىك، اتالعان جيىننىڭ ەكىنشى كەزەڭىن 28 قازاندا الماتىدا وتكىزۋ جوسپارلانىپ وتىر. وندا ۇلتتىق جانە ءداستۇرلى ات سپورتى ويىندارىن ودان ءارى دامىتۋ جونىندەگى شۇعىل مىندەتتەر جانە دۇنيەجۇزىلىك كوكپار قاۋىمداستىعىنىڭ جارعىسىنا وزگەرىستەر مەن تولىقتىرۋلار ەنگىزۋ ماسەلەلەرى قارالادى.