كەشە ازيا ويىندارىندا قازاقستان كومانداسى ەكى التىن، ءبىر كۇمىس جانە التى قولا مەدال جەڭىپ الدى.
ستەند اتۋدان سكيت باعدارلاماسى بويىنشا ارالاس كوماندالىق سايىستا ونەر كورسەتكەن اسەم ورىنباي/ەدۋارد ەششەنكو جۇبىنىڭ جۇلدىزى جارقىرادى. فينالدا كۋۆەيت سپورتشىلارىنان ءباسى بيىك بولىپ، التىننان القا تاقتى. ال 10 مەتر قاشىقتىقتان جىلجىمالى نىساناعا وق اتۋ سايىسىندا 18 جاستاعى زۋحاراعا تەڭ كەلەتىن ەشكىم بولعان جوق. ءسويتىپ، التىن القاعا قول جەتكىزدى. ال 10 مەتر قاشىقتىقتان جىلجىمالى نىساناعا وق اتۋ سايىسىندا قازاقستان ايەلدەر قۇراماسى (زۋحرا يرنازاروۆا، فاتيما يرنازاروۆا، الەكساندرا سادۋاقاسوۆا) 2-ورىنعا يە بولىپ، كۇمىس مەدالدى مىسە تۇتتى.
جاعاجاي ۆولەيبولىنان جۇپتىق باسەكەدە دميتريي ياكوۆليەۆ پەن سەرگەي بوگاتۋ قولا مەدال ءۇشىن ماچتا يران كومانداسىن جەڭدى، ەسەپ 2:0 (25:23، 30:28).
سپورتتىق گيمناستيكادان ات سناريادىندا ونەر كورسەتكەن 25 جاستاعى ناريمان قۇربانوۆ قولا جۇلدەگە يە بولدى. وتانداسىمىز 15.100 ۇپاي جينادى.
ال 50 مەترگە باتتەرفلياي ادىسىمەن ءجۇزۋ جارىسىندا ادىلبەك مۋسين قولانى قاناعات تۇتتى. بۇل سپورتشىنىڭ وسى ازيا ويىندارىنداعى ەكىنشى قولا مەدالى. ول 100 مەتر قاشىقتىقتاعى وسى ءادىس بويىنشا دا قولاعا قول جەتكىزگەن بولاتىن.
تاەكۆوندودان ۇلتتىق قۇرامانىڭ سپورتشىلارى دەنيز جانسەل (+67 كگ) جانە سمايىل دۇيسەباي (+80 كگ) ازيا ويىندارىنىڭ قولا جۇلدەگەرلەرى اتانسا، سەمسەرلەسۋدەن ەرلەر قۇراماسى (مۇحامەدالي ءراحمانالى، نازارباي ساتتارحان، جانات نابييەۆ، ارتەم ساركيسيان) كوماندالىق جارىستا ۇشتىكتەر قاتارىنان كورىنىپ، قولانى قولقا تۇتتى.
اسلانبەك شىمبەرگەنوۆ قىتايلىق قارسىلاسىن جەڭىپ، بوكستان جارىستىڭ كەلەسى كەزەڭىنە ءوتتى. 5x5 باسكەتبولدا قازاقستاننىڭ ەرلەر كومانداسى ءباا قۇراماسىن 59:49 ەسەبىمەن جەڭىسكە جەتسە، 3x3 باسكەتبولدا تايلاندتىق قارسىلاستارىن 19:16 ەسەبىمەن جەڭدى.
كيريلل گەراسيمەنكو ۇستەل تەننيسىنەن 1/8 فينالدا ۆەتنامدىق سپورتشىنى 4-0 ەسەبىمەن سەنىمدى تۇردە جەڭدى. سۋ دوبىنان ايەلدەر قۇراماسى دا ناتيجەلى ويىن كورسەتىپ، وڭتۇستىك كورەيالىق قارسىلاستارىن 24:4 ەسەبىمەن جەڭدى.
5ء-شى جارىس كۇنىنىڭ قورىتىندىسى بويىنشا قازاقستان قۇراماسىنىڭ قورجىنىندا 3 التىن، 3 كۇمىس جانە 16 قولا جۇلدە بار.