كوك تۋ مەن شارلارعا كومكەرىلگەن سورەلەر: ەلىمىزدە ەرەكشە چەللەندج باستالدى

قازاقستاندا تاۋەلسىزدىك كۇنى قارساڭىندا الەۋمەتتىك جەلىدە دە، ەل دۇكەندەرىندە دە ەرەكشە پاتريوتتىق باستاما قىزۋ تالقىلانىپ جاتىر. استاناداعى ازىق-تۇلىك دۇكەنىنەن باستالعان چەللەندج بۇگىندە باسقا دا قالالارعا جەتتى. اqshamnews.kz ءتىلشىسى مەرەكە قارساڭىنداعى تىڭ دۇنيەلەردى ءتىزدى. 

4 مىڭنان استام شار، مىڭنان اسا تۋمەن بەزەندىرىلگەن دۇكەن 

ترەدس جەلىسىندە استانا قالاسىنداعى ازىق-تۇلىك دۇكەنىنىڭ سۋرەتتەرى تارادى. وندا "ازىرەت ماركەت" اتتى قاراپايىم تۇرعىن ءۇي كەشەنىندەگى دۇكەننىڭ تاۋەلسىزدىك كۇنىنە بەزەندىرىلگەنىن بايقاۋعا بولادى.

"ازىرەت ماركەت" دۇكەنى استانانىڭ وڭ جاعالاۋىندا ورنالاسقان. دۇكەن يەسى تەمىرحان ءاشىم ۇلى ءوز ساۋدا نۇكتەسىن مىڭداعان كوك شار مەن مەملەكەتتىك تۋمەن بەزەندىرىپ، ناعىز مەرەكەلىك اتموسفەرا سىيلادى. بۇل ارەكەتى كوپشىلىكتىڭ كوڭىلىنەن شىعىپ، وزگە كاسىپكەرلەرگە دە ۇلگى بولدى.

"بۇل ارقىلى تاۋەلسىزدىك كۇنىن جاي عانا رەسمي داتا ەمەس، ەل بولىپ سەزىنەتىن، ماقتانىش پەن شۇكىرلىككە تولى ەرەكشە كۇن رەتىندە اتاپ ءوتۋدى ماقسات ەتتىم. ءار قازاق ءۇشىن، ءار قازاقتاندىق ءۇشىن بۇل كۇن قاشان دا ەلەۋلى ورىن الۋعا ءتيىس"، - تەمىرحان مىرزا. 

كوپ ادام دۇكەن ءىشىن فوتو-ۆيدەوعا ءتۇسىرىپ، الەۋمەتتىك جەلىگە جۇكتەپ جاتىر. 

تۋگيس قوسىمشاسىندا دا دۇكەنگە جىلى پىكىرلەر قالدىرىپ جاتىر. 

حالىقتىڭ قولداۋى مەن قويانبايەۆتىڭ رەاكسياسى

باستاما الەۋمەتتىك جەلىدە لەزدە تارادى. پايدالانۋشىلار پىكىر قالدىرىپ، تەمىرحان مىرزانىڭ ازاماتتىق ۇستانىمىن، پاتريوتتىق نيەتىن ەرەكشە اتاپ ءوتىپ جاتىر. پىكىرلەر بولىمىندە:

"بالالارىمىزعا ناعىز پاتريوتيزم وسىلاي كورسەتىلۋ كەرەك"، "مەرەكەنىڭ رۋحىن سەزىندىك"، "تاۋەلسىزدىك كۇنى وتپەي جاتىپ، جاڭا جىلعا دايىندالىپ كەتكەندەرگە ۇلگى بولسىن" دەگەن سىندى پىكىرلەر جازىلىپ جاتىر. 

بەلگىلى پروديۋسەر نۇرلان قويانبايەۆ تا بۇل باستامانى قولداپ، ءوزىنىڭ پاراقشاسىندا اتاپ ءوتىپ، كاسىپكەردىڭ يدەياسىن وڭ باعالادى. دۇكەن يەسىنىڭ يدەياسىنا ريزاشىلىعىن ءبىلدىرىپ، ساۋداسىن دا جۇرگىزىپ كەتتى. 

چەللەندجگە باسقا دۇكەندەر دە قوسىلدى

تەمىرحان ءاشىم ۇلىنىڭ باستاماسى جاي عانا دۇكەننىڭ ىشىندە قالىپ قويعان جوق. ونىڭ يدەياسىن ەلۋدەن استام ادام ءبولىسىپ، كەي كاسىپكەرلەر بىردەن ەستافەتانى جالعاستىرىپ اكەتتى.

بىرنەشە دۇكەن يەلەرى:

• ءوز ساۋدا ورىندارىن كوك شارلارمەن، جالاۋشالارمەن، باننەرلەرمەن بەزەندىردى؛

• مەرەكە قارساڭىندا كەلۋشىلەرگە شاعىن سىيلىقتار، جەڭىلدىكتەر قاراستىردى؛

• تاۋەلسىزدىك كۇنىنە ارنالعان ارنايى فوتوزونالار ۇيىمداستىردى.