ءۇندىستاننىڭ نيۋ-دەلي قالاسىندا ءوتىپ جاتقان يۋنەسكو ۇكىمەتارالىق كوميتەتىنىڭ 20-شى سەسسياسىندا «كيىز ءۇيدى جاساۋ جانە قولدانۋ ءداستۇرى» اتالىمىن كەڭەيتۋ تۋرالى شەشىم قابىلداندى.
بۇل تۋرالى مەملەكەتتىك كەڭەسشى ەرلان قارين ءمالىم ەتتى، دەپ حابارلايدى Aqshamnews.kz.
ونىڭ ايتۋىنشا، قازاقستاننىڭ "سالبۋرىن" ۇلتتىق ءوتىنىمى جانە "كەستە تىگۋ ونەرى"، "الپامىس جىرى"، تاقيا اتالىمدارى يۋنەسكو-نىڭ قاراۋىندا.
"ءۇندىستاننىڭ نيۋ-دەلي قالاسىندا ءوتىپ جاتقان يۋنەسكو ۇكىمەتارالىق كوميتەتىنىڭ 20-شى سەسسياسىندا «كيىز ءۇيدى جاساۋ جانە قولدانۋ ءداستۇرى» اتالىمىن كەڭەيتۋ تۋرالى شەشىم قابىلداندى. ونى بەدەلدى تىزىمگە 2014 جىلى قازاقستان مەن قىرعىزستان ەنگىزگەن بولاتىن. بۇل كيىز ءۇيدى الەمدىك مادەنيەتتىڭ ءبىر بولشەگى رەتىندە تانۋ مۇمكىندىگىن ارتتىرادى جانە ورتالىق ازيا مۇراسىنىڭ ورتاق ەكەنىن ايعاقتايدى.
قازاقستان وسىعان دەيىن يۋنەسكو-نىڭ ماتەريالدىق ەمەس مادەني مۇرالارىنىڭ رەپرەزەنتاتيۆتى تىزىمىنە 14 اتالىم قوسقان بولاتىن. ەلىمىز اتالعان كورسەتكىش بويىنشا 183 مەملەكەتتىڭ ىشىندە ۇزدىك 25 ەلدىڭ قاتارىندا تۇر.
سونىمەن قاتار قازىرگى تاڭدا قازاقستاننىڭ «سالبۋرىن» ۇلتتىق ءوتىنىمى جانە «كەستە تىگۋ ونەرى» (قازاقستان، وزبەكستان، تاجىكستان)، «كيىز باسۋ ونەرى» (قازاقستان، قىرعىزستان، ازەربايجان، يران، موڭعوليا، تاجىكستان، تۇركيا، وزبەكستان)، «الپامىس جىرى» (قازاقستان، ازەربايجان، تۇركىمەنستان، تۇركيا، وزبەكستان)، «تاقيا» (قازاقستان، تۇركىمەنستان، ازەربايجان، قىرعىزستان، تاجىكستان، وزبەكستان، تۇركيا) اتالىمدارى يۋنەسكو-نىڭ قاراۋىندا ەكەنىن ايتا كەتكەن ءجون"، - دەدى ە. قارين.