بۇل شايدىڭ قاسيەتتەرى جايلى ديەتولوگ مامان ايتتى. قان قىسىمى تومەن ادامدارعا بۇل سۋسىندى بايقاپ ىشكەن ءجون.
كوك شايدى ءدامى مەن پايداسى تاماشا ۇيلەسىم تاپقان سۋسىن دەپ اتايدى. ءبىراق بۇل كوك شايدىڭ ادام دەنساۋلىعى ءۇشىن استە زيانسىز ەكەنىن بىلدىرمەيدى. ماسەلە اعزانىڭ ەرەكشەلىكتەرى مەن ءتۇرلى «گاسترونوميالىق جاعدايلارى» جونىندە. دەنساۋلىققا الاڭ بولماۋ ءۇشىن، كوك شايدى قالاي تۇتىنۋ كەرەكتىگىن رەن-تۆ-عا بەرگەن سۇحباتىندا ديەتولوگ داريا رۋساكوۆا ايتتى، دەپ حابارلايدى Almaty-akshamy.kz ءتىلشىسى.
ماماننىڭ ايتۋىنشا، كوك شايدىڭ پايداسى جايلى ءبارى بىلەدى. بۇل سۋسىننىڭ ءتيىمدى ءارى وڭ پايداسى - ونىڭ قۇرامىنداعى دارۋمەندەر مەن تانيندە، انتيوكسيدانتتى قاسيەتتەرگە يە ەكەندىگىندە، قاتەرلى ىسىكتەن قورعايتىندىعىندا، اعزادان توكسيندەردى شىعارادى، تونۋستى ساقتايدى، نەسەپ ايدايتىن، ت.ب قاسيەتتەرگە يە.
«كوك شاي تاماقتى تىم تويا جەۋگە بەيىم ادامداردىڭ تابەتىن رەتتەۋگە جاقسى اسەر ەتەدى. كوك شايدى تاماقتانۋ ۋاقىتتارىنىڭ اراسىندا ىشسە بولادى، بۇل تابەتتى ازداپ باسادى»، - دەدى رۋساكوۆا.
كوپتەگەن ادامدار سالاۋاتتى ءومىر سالتىن ساقتامايدى، دۇرىس تاماقتانبايدى، الكوگول تۇتىنىپ، تەمەكى تارتادى، ال كوك شايدى امبەباپ ءدارى رەتىندە قارايدى.
«شىن مانىندە، بۇل ولاي ەمەس. كوك شاي وزدىگىنەن – پايدالى ءونىم، ءبىراق ول بارلىق ارتىق-تۇرتىقتىڭ ورنىن تولتىرمايدى»، - دەپ ناقتىلادى ديەتولوگ.
زيانى
كەيبىر ادامدارعا باسقا ونىمدەر جاقپاۋى مۇمكىن. سول سياقتى كوك شاي مەن قارا شايدى دا اعزالارى قابىلداي قويماۋى ىقتيمال. كوفەين ەسەبىنەن بۇل سۋسىن جۇيكە جۇيەسىنە ادەتتەگىدەي اسەر ەتەدى، سول سەبەپتى ونى كوفەمەن جانە الكوگولمەن ارالاستىرماعان ءجون. بۇل شاي كەي ادامداردى تىنىشتاندىرسا، باسقالارىنىڭ جۇرەك قاعىسىن جىلدامداتىپ جىبەرەتىن قاسيەتكە يە.
«كەشكى ۋاقىتتا شاي ءىشىپ العان كەيبىر ادامداردىڭ ۇيقىسى بۇزىلادى. سۇيىقتىقتى شىعارۋ ماقساتىندا كوك شايدى ءجيى ءىشۋ گيپوتەنزيۆتى اسەر بەرەدى، ياعني، قان قىسىمى تۇسەدى»، - دەپ اتاپ ءوتتى رۋساكوۆا.
قان قىسىمى جوعارى ادامدار شايدىڭ بۇل قاسيەتىن باعالايدى، الايدا، كەرىسىنشە، قان قىسىمى تومەن ادامدار وزدەرىن ناشار سەزىنۋلەرى مۇمكىن.
كوك شايدىڭ دۇرىسىن قالاي تاڭداۋ كەرەك؟
ەگەر شاي پەستيسيدتەر مەن ءتۇرلى تىڭايتقىشتار قولدانىلمايتىن پلانتاسيالاردان جينالعان بولسا، ونىڭ پايداسى دا مول بولماق. الايدا شاي جاپىراقتارى ءوسىپ، ونى تاسىمالداۋ كەزىندە لاستانۋ ماسەلەسى بار.
«سونىمەن قاتار، كوپتەگەن جالعان ونىمدەر بار. ونداي ونىمدەر زيانىن تيگىزىپ، اللەرگيالىق رەاكسيا تۋدىرۋى ىقتيمال»، - دەپ ەسكەرتەدى مامان.
ساتىپ الۋشى ادام ۇنەمى ءونىمنىڭ قانشالىقتى جالعان نەمەسە شىنايى ەكەنىن كوزبەن كورىپ انىقتاي المايدى. سول ءۇشىن داريا رۋساكوۆا ابدەن تەكسەرىلگەن سەنىمدى ماركالاردان الۋعا كەڭەس بەرەدى. شاي جاپىراقتارى تۇتاستاي بولۋى قاجەت. ەگەر جاپىراقتارى ۇساقتالعان جانە پاكەتتەلگەن بولسا، ونىڭ ساپالى بولۋى ەكىتالاي.