جاپوندىقتار مەن قىتايلىقتار كوك شايدى باۋىر اۋرۋلارىنىڭ الدىن الۋ ءۇشىن ىشەدى ەكەن.
شاي – بۇل بۇكىل الەم بويىنشا كوپ قولدانىلاتىن سۋسىنداردىڭ ءبىرى. ونىڭ ءشولدى باسىپ، اعزانى سەرگىتەتىن ءارى نارلەندىرەتىن قاسيەتتەرى بار. ال شايدىڭ باۋىرعا اسەرى قانداي؟ جاپوندىقتار مەن قىتايلىقتار كوك شايدى باۋىر اۋرۋلارىنىڭ الدىن الۋ ءۇشىن ىشەدى ەكەن.
بۇل تۋرالى Almaty-akshamy.kz. Ernur.kz-كە سىلتەمە جاساپ حابارلايدى.
ال باسقا ءبىر زەرتتەۋلەرگە سۇيەنسەك، قارا شاي باۋىر كلەتكالارىن الكوگولدى ىشىمدىكتىڭ اسەرىنەن بولاتىن بۇزىلىستاردان ساقتايدى دەلىنگەن. وسىنداي تۇجىرىمدارمەن قاتار كوك شاي مەن قارا شايدىڭ باۋىرعا كەلتىرەر پايداسى مەن زيانى جايلى تارقاتىپ ايتپاقپىز. كوك شاي جوعارىدا ايتىپ وتكەنىمىزدەي باۋىردى اتى جامان اۋرۋلاردان ساقتاۋعا سەپتىگىن تيگىزەدى. اتالمىش سۋسىندى ءىشۋ ارقىلى ءبىز باۋىر جاسۋشالارىن قورعاي الامىز. ونىڭ قۇرامىنداعى وتە كوپ مولشەردەگى انتيوكسيدانتتار وسىنداي كۇشكە يە. سونىمەن بىرگە باۋىردى ءتۇرلى توكسيندەردەن تازارتادى. كوك شاي قانداعى سۋ-تۇز الماسۋىن قالىپقا كەلتىرىپ، نەسەپ ايدايدى. مۇنىڭ ءبارى باۋىردىڭ جۇمىسىن جەڭىلدەتەتىنى ءسوزسىز. ءتىپتى، كوك شايدىڭ باۋىردىڭ پاتولوگيالىق اۋرۋلارىنىڭ الدىن الاتىن كەرەمەتتەي اسەرى بار. الايدا كوك شايدى تىم كوپ ىشۋگە دە بولمايدى دەيدى ماماندار. ويتكەنى كوك شايدى شامادان اسىرىپ ىشكەندە باۋىر جەتكىلىكسىزدىگىنە اپارىپ سوقتىرۋى مۇمكىن. كوك شايدى كۇنىنە 3 شىنىدان ارتىق ىشپەگەن ابزال. قارا شايدىڭ باۋىرعا اسەرى قانداي؟ قارا شاي دا كوك شاي سەكىلدى اۋرۋدىڭ الدىن الۋعا كومەكتەسەتىن سۋسىن. كۇنىنە 2 رەت قاراي شاي نەمەسە كوفە ىشكەن ادامنىڭ باۋىر اۋرۋلارىنا شالدىعۋى 25 پايىزعا تومەندەيدى دەگەن دەرەك بار. قارا شايدىڭ اسىرەسە قان قىسىمىن تومەندەتىپ، قان تامىرلارى اۋرۋلارىمەن اۋىراتىندارعا پايداسى زور. سونىمەن قاتار ىستىق شايدى ۇرتتاپ-ۇرتتاپ ىشسەڭىز ءوت جولدارىن تازالاپ، وتتە تاستىڭ پايدا بولۋىنا جول بەرمەيدى. قارا شايدىڭ قۇرامىنداعى تەمىر، مىرىش، فتور، تانين سياقتى زاتتاردىڭ ارقاسىندا وسىنداي اسەرلەر بەرىپ، دەنساۋلىعىڭىزدىڭ سىر بەرمەۋىنە سەپتىگىن تيگىزەتىنىن ەستەرىڭىزگە سالامىز.