مادەنيەت جانە سپورت مينيسترلىگى كوپشىلىككە ارنالعان كىتاپحانا قىزمەتكەرلەرىن انكارا قالاسىنداعى پرەزيدەنت اكىمشىلىگىنە قاراستى ۇلتتىق كىتاپحانادا بىلىكتىلىگىن ارتتىرۋعا جىبەرۋدى جوسپارلاپ وتىر، دەپ حابارلايدى Almaty-akshamy.kz
بۇل تۋرالى مينيسترلىكتىڭ باسپا ءسوز قىزمەتى حابارلاعان.
وقىتۋ شارالارى اياسىندا وتاندىق كىتاپحانا ماماندارى تۇرىك كىتاپحانالارىنىڭ جۇمىسىمەن تانىسىپ، تاجىريبە الماسادى. اتاپ ايتقاندا، سيرەك باسىلىمدار قورىمەن جۇمىس ىستەۋ، رەستاۆراسيا تاجىريبەسى، كىتاپحاناداعى اقپاراتتاندىرۋ ءۇردىسى، زاماناۋي بيبليوگرافيالىق شارالار جانە ت.ب. باعىتتار بويىنشا بىلىكتىلىكتى ارتتىرادى.
بۇگىندە قولدانىستاعى زاڭنامادا بەلگىلەنگەن ءتارتىپ بويىنشا ءتيىستى ۇيىمداستىرۋ جۇمىستارى جۇرگىزىلىپ جاتىر.
«مادەنيەت جانە سپورت مينيسترلىگى جىل سايىن ەلىمىزدىڭ مەملەكەتتىك مادەنيەت ۇيىمدارى قىزمەتكەرلەرىنىڭ الىس جانە جاقىن شەتەلدەردە بىلىكتىلىكتى ارتتىرۋ شارالارىن ۇيىمداستىرادى. وسىعان دەيىن مەملەكەتتىك مۋزەيلەر مەن مۋزەي-قورىقتاردىڭ، مۋزىكالىق جانە درامالىق تەاترلاردىڭ، كوستيۋم بۋتوفورياسى مەن كوستيۋم اكسەسسۋارلارى قىزمەتكەرلەرىن وقىتتىق. بۇگىنگى كۇنى قازاقستاندىق كىتاپحانالارداعى سيرەك باسىلىمدارمەن جۇمىس ىستەيتىن جانە رەستاۆراسيا ماماندارىنىڭ بىلىكتىلىگىن ارتتىرۋ اسا ماڭىزدى بولىپ وتىر»، - دەدى مادەنيەت جانە سپورت ۆيسە-مينيسترى نۇرعيسا داۋەشوۆ.