جىل سوڭىنا دەيىن الماتىدا قونىس اۋدارۋ قورى قۇرىلادى.
بۇل تۋرالى قالا اكىمى ەربولات دوسايەۆ تۇركسىب اۋدانىنىڭ تۇرعىندارىمەن كەزدەسۋىندە ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ەربولات دوسايەۆ مەگاپوليستە تۇرعىن ءۇي قورىن جاڭارتۋدىڭ جاڭا باعدارلاماسى ازىرلەنىپ جاتقانىن ايتتى.
«بىلتىر ءماسليحات قونىس اۋدارۋ قورىن قۇرۋعا قاتىستى ويىمدى قولداعان ەدى. قور وسى جىلدىڭ ءۇشىنشى توقسانىندا ءوز جۇمىسىن باستايتىن بولادى. ءبىز الدىمەن بيۋدجەت ەسەبىنەن باسپانا ساتىپ الامىز، سول جەرگە بۇزىلاتىن ۇيلەردىڭ تۇرعىندارىن كوشىرەمىز. تەك سودان كەيىن عانا اپاتتى ۇيلەر سۇرىلەدى. وسى شارالاردىڭ بارلىعى ادامداردىڭ جايلى ءومىر ءسۇرۋى ءۇشىن جاسالادى. سونىمەن قاتار الماتى الەۋمەتتىك-كاسىپكەرلىك كورپوراسياسى ارقىلى جەكە ينۆەستور جۇزەگە اسىراتىن جوبالارعا قارجى ءبولىندى»،- دەدى الماتى اكىمى.
ونىڭ ايتۋىنشا، رەنوۆاسيا باعدارلاماسى ۋاقىتشا توقتاتىلدى.«جاقىن ارادا ۇكىمەت الماتى قالاسىنىڭ 2040 جىلعا دەيىنگى باس جوسپارىن بەكىتتەدى دەپ ۇمىتتەنەمىن. قازىرگى ۋاقىتتا ءتيىمدى باعدارلاما ازىرلەۋ ءۇشىن رەنوۆاسيا باعدارلاماسىن ۋاقىتشا توقتاتتىم. جاڭارتىلعان نۇسقاداعى جوبا جالپى تالقىلاۋعا ۇسىنىلادى»، - دەدى ەربولات دوسايەۆ.