بۇگىن قازاقستان مۇسىلماندارى ءدىني باسقارماسى الماتى وكىلدىگىنىڭ ۇيىمداستىرۋىمەن 25 قازان ۇلتتىق مەرەكە قارساڭىندا «DASTUR FEST» كورمەسى ءوتتى، دەپ حابارلايدى almaty-akshamy.k
ءدىن مەن ءداستۇر دارىپتەلگەن كورمەنىڭ اشىلۋ سالتاناتىنا قمدب-نىڭ نايب ءمۇفتيى كەنجەالى قاجى قوڭىراتباي ۇلى، قوعام قايراتكەرلەرى سماعۇل ەلۋباي، مارات توقاشبايەۆ، الماتى قالاسىنىڭ باس يمامى تولەبي وسپان مەن باسقا دا زيالى قاۋىم وكىلدەرى، مەشىت اقساقالدارى مەن جاماعاتتارى جانە يمامدار قاتىستى.
باس ءمۇفتي ناۋرىزباي قاجى تاعان ۇلى حازرەتتىڭ ىستىق سالەمىن جەتكىزگەن نايب ءمۇفتي كەنجەالى قاجى مىرزابايەۆ جينالعان حالىقتى قۇتتىقتاپ، ارنايى ءسوز سويلەدى. ق ر مادەنيەت قايراتكەرى يسلام جەمەنەي مەن ق ر ەڭبەك سىڭىرگەن قايراتكەرى قاراكوز سۇلەيمەنوۆا دا بارشانى مەرەكەمەن قۇتتىقتاپ، ءدىن مەن ءداستۇر ساباقتاستىعىن جاڭعىرتىپ جۇرگەن قازاقستان مۇسىلماندارى ءدىني باسقارماسىنىڭ باستاماسىنا ريزاشىلىقتارىن ءبىلدىردى.
الماتى ورتالىق مەشىتىنىڭ اۋلاسىندا وتكەن كورمەنىڭ سالتاناتتى اشىلۋىندا باتىرلار توبى بۇركىت، نايزا-شوقپارىمەن ونەر كورسەتسە، ۇلتتىق شاپان مەن كيمەشەك شەرۋى ءسالت-داستۇرىمىزدىڭ وزىق ۇلگىلەرىن پاش ەتتى.
اق جاۋلىقتى انالار شاشۋ شاشىپ، كەلىندەر كوپشىلىككە باۋىرساق ءدامىن ۇسىندى. اق بوز اتتىڭ قۇلاعىندا ەركىن ويناعان اكتەر ماديار سەرىكبايەۆ ات ابزەلدەرىنىڭ اتاۋلارى مەن قازاقى ماعىناسىن ءتۇسىندىرىپ ءوتتى.
سونىمەن قاتار تەمىر ۇستاسىنىڭ كيىمدەرى كوپشىلىك نازارىنا ۇسىنىلىپ، قازاق داستۇرىندەگى تاباق تارتۋ ءادىسىن ناعىز مامان جۇرتشىلىققا تانىستىردى. اقىن، سازگەر جاكەن وماروۆ ءدان مەن ءداستۇر ساباقتاستىعىنا ارنايى جازىلعان ارناۋىن ەلگە كۇمبىرلەگەن دومبىرا ۇنىمەن جەتكىزدى. كورمەنىڭ كەلەسى كەزەڭىندە ءتاي-تاي باسقان بۇلدىرشىندەردىڭ تۇساۋى كەسىلىپ، كەلگەن كوپشىلىك قاۋىم اجەلەردىڭ ءجۇن ءتۇتۋ، ساباۋ، ءجىپ ءيىرۋ تاعى باسقا سالت-داستۇرلەردى ورىنداۋىن تاماشالادى.
سونداي-اق كورمەگە ۇلتتىق كيىمدەر ەرلەر شاپانى، كيمەشەك، ورامال، باس كيىمدەرى جانە زاماناۋي ۇلگىدەگى ۇلتتىق كيىمدەردى دارىپتەپ جۇرگەن اتاقتى ديزاينەرلەردىڭ توپتامالارى ەل نازارىنا ۇسىنىلدى. ءسانى مەن ساپاسى جوعارى قازاقى كيىمدەردى كيىپ كورىپ، سول جەردە ساتىپ الۋعا مۇمكىندىك الدى. كورمەدە اعاشتان ويىپ جاسالىپ، ناعىز شەبەردىڭ قولىنان شىققان ءتۇرلى دومبىرالار، تەمىر ۇستاسى جاساعان بۇيىمداردى تاماشالاپ، ۇلتتىق تاعام تۇرلەرىنەن ءدام تاتۋعا بولادى. «MUFTYAT» باسپاسىنان شىققان كىتاپتار دا كورمەگە كورىك قوستى.
«وقىرمانمەن وي ءبولىس» جوباسى اياسىندا عالىم، PhD دوكتور ازامات جاماشيەۆ، PhD دوكتورانتى سىرىم شاكيزادا جانە ۇستاز ەرلان اقتايەۆتىڭ وقىرماندارمەن كەزدەسۋى ءوتتى. مەرەكە اقشام نامازىنا دەيىن جالعاستى.
ۇلتتىق مەرەكە قارساڭىندا ۇيىمداستىرىلعان «ءداستۇر فەست» كورمەسىنىڭ باستى ماقساتى – حالىق اراسىندا ءدىن مەن ءداستۇر ساباقتاستىعىن دارىپتەۋ بولىپ تابىلادى.
