م.گاندي ساياباعىندا بالالار كۇنىنە وراي «كىتاپ الەمىندەگى باقىتتى بالالىق شاق» اتتى ءىس-شارا ءوتتى.
مەرەكەلىك شارا المالى اۋدانى اكىمدىگىنىڭ قولداۋىمەن حالىقارالىق بالالاردى قورعاۋ كۇنىندە قالا تۇرعىندارىنىڭ، ونىڭ ىشىندە بۇلدىرشىندەردىڭ كوڭىل-كۇيىن كوتەرىپ، قالا ءىشىن كوركەيتۋ ماقساتىندا ۇيىمداستىرىلدى.
"بۇگىن مەرەكەلىك باعدارلاما نەگىزىندە م.گاندي ساياباعىندا ۇلتتىق ويىندار مەن سپورتتىق جارىستار ويناتىلدى. سونداي-اق، "شەبەر قولدار" ۇيىرمەسى بولدى، «جارقىن جاز» باعدارلاماسى اياسىندا سۋرەتشىلەر سايىسى ءوتتى. ءىس-شارا اياسىندا بالالار ءوز ونەرلەرىن كورسەتە الدى. دومبىرا تارتىپ، ان-كۇيلەرىمەن كوپشىلىكتى ءتانتى ەتتى"، – دەدى №4 كىتاپحانا بولىمشەسىنىڭ قىزمەتكەرى تولقىن قۇرامىسوۆا.
ۇيىمداستىرۋشىلار شارا اياسىنداعى جارىستاردىڭ جەڭىمپازدارىنا ءارتۇرلى سىيلىقتار بەرىپ، ودان بولەك بارلىق بۇلدىرشىندەرگە قىزىقتى كىتاپتار سىيلادى. ساياباق اۋماعىنداعى جارىسا جۇگىرگەن بالالار مەن جۇزدەرى جارقىراعان اتا-انالار مەرەكەلىك كوڭىل-كۇيدە ءجۇردى.