كەيىنگى 5 جىلدا بيۋدجەت شىعىنى كىرىسىنەن 2 ەسە اسىپ كەتتى. 2023-2025 جىلدارعا ارنالعان رەسپۋبليكالىق بيۋدجەت ناقتىلانىپ جاتقان سەنات وتىرىسىندا سپيكەر ماۋلەن اشىمبايەۆ وسىنداي پىكىر ءبىلدىردى، -دەپ حابارلايدى اlmaty-akshamy.kz قازاقپارات-قا سىلتەمە جاساپ.
«ءبىر عانا ساندى كەلتىرەيىن. كەيىنگى بەس جىلدا رەسپۋبليكالىق بيۋدجەتتىڭ مۇنايدان تىس كىرىسى 66 پايىز وسكەن. ءبىر قاراساڭ، 5 جىلدىڭ ديناميكاسى جاقسى سياقتى. ال شىعىس ءدال وسى كەزەڭدە 120 پايىز ارتقان. ياعني، بىزدە رەسپۋبليكالىق بيۋدجەتتىڭ شىعىسى كىرىستەن ەكى ەسە الدا كەلەدى. وسىعان بايلانىستى ۇكىمەتتىڭ قاجەتتى اقشانى نە ۇلتتىق قوردان، نە بيۋدجەت تاپشىلىعىن ۇلعايتۋ ارقىلى الىپ وتىرعانى تۇسىنىكتى. بۇل بيۋدجەت جوباسىندا تاپشىلىق بۇرىنعى مولشەردە قالعانىن كورىپ وتىرمىز. ياعني، سايكەسىنشە ۇلتتىق قوردان الىپ وتىرمىز»، - دەدى ماۋلەن اشىمبايەۆ.
ونىڭ پايىمىنشا، ۇكىمەتتە بۇدان باسقا جول دا جوق.
«ءبىراق ودان باسقا كوز جوق بولىپ تۇر عوي. نەمەسە سالىق بازاسىن ۇلعايتۋ كەرەك. سوندا نەگىزگى مەسسەدج – بارىمىزگە قارجىلىق تارتىپكە كەلۋ كەرەك. ۇلتتىق قور قاراجاتىن تەك ستراتەگيالىق شىعىندارعا عانا جۇمساۋىمىز كەرەك جانە قوردىڭ اكتيۆىن ارتتىرۋدىڭ شىنايى ستراتەگياسى قولىمىزدا بولۋى قاجەت. جىل سايىن 4 ترلن تەڭگەدەن الساق (ۇلتتتىق قوردان – رەد.)، ونى قالاي ۇلعايتامىز؟ دەپۋتاتتار ۇلتتىق قوردىڭ قاراجاتىن پايدالانۋ ستراتەگياسىن ەمەس، اكتيۆىن ارتتىرۋ ستراتەگياسىن كورگىسى كەلەدى»، - دەدى سەنات سپيكەرى.