بۇل جولدا ەۋروپانىڭ وزىق تاجىريبەسىن ۇلگى ەتىلمەك.
ءقازىردىڭ وزىندە قاجەتتى جابدىقتاردى الۋ بويىنشا كەلىسىمدەر باستالدى، دەپ حابارلايدى Almaty-akshamy.kz 24.kz-كە سىلتەمە جاساپ.
اۋەجاي تالاي كەزدەسۋ مەن قوشتاسۋدىڭ كۋاسى. مۇنداعى ءاربىر جاندى قۋانىش، تولقىنىس، كەيدە ءبىرتۇرلى وكىنىش بيلەيدى. ءتاتتى سەزىمدەردى بارىنشا سەزىنۋ ءۇشىن اسىعىپ-اپتىعۋدىڭ قاجەتى شامالى. اتتەگەن-ايى، كوبىنە جولاۋشى مادەنيەتى ۇمىتىلىپ، شىدامسىزدىققا بوي الدىرىپ جاتامىز. اسىرەسە تەكسەرۋ ورىندارىندا.
«تەكسەرۋ قىزمەتىنەن تەكسەرۋدەن وتكەن كەزدە كوپ جولاۋشىلار ايتادى، ءبىزدىڭ اياق كيىمىمىزدى نە ءۇشىن تەكسەرەدى؟ بىزدە قاۋلىدا جازىلعان، بۇكىل جولاۋشىلار وتكەن ءار رەيسكە 10%-تەن ارتىعىن ءبىز قولمەن تەكسەرۋىمىز كەرەك. راندومچەك دەيدى اعىلشىنشا، قازاقشا كەزدەيسوق سيفرمەن بەلگىلەنەدى. سونداي ادام بەلگىلەنگەندە، ءبىزدىڭ جۇمىسشىلار ونىڭ دەنەسىن قولمەن تەكسەرەدى. اياق كيىمىن سۇرايدى. قوندىرعى ارقىلى تەكسەرەدى. قول جۇگىن دە قولمەن تەكسەرەدى.»، - دەيدى اۋەجايداعى تەكسەرۋ قىزمەتى بولىمشەسىنىڭ باستىعى عابيت سۇلەيەۆ.
ەلوردا اۋەجايىنداعى تەكسەرۋ بەكەتىنەن كۇنىنە 5000-نان اسا جولاۋشى وتەدى. ەلىمىزدىڭ اۆياسيالىق اكىمشىلىگى ولاردىڭ سانى ارتا بەرەرىنە سەنىمدى. وسى ورايدا رەسپۋبليكاداعى بارلىق اۋەجايدا مەملەكەتتىك ءبىرىڭعاي اۆياسيالىق قاۋىپسىزدىك ۇيىمىن قۇرۋ كوزدەلەدى.
«ەۋروپا ستاندارت 4، ستاندارت 5-كە كوشىپ جاتىر. ولاردىڭ تەحنيكالىق جابدىقتارى «بوديسكانەرلەر» دەپ اتالادى. ءبىزدىڭ اۋەجايلاردا وسى بوديسكانەرلەر تەك استانادا قولدانىلادى. ەندى اقىرىنداپ 2027 جىلعا دەيىن وسى تەحنيكالىق جابدىقتاردى بۇكىل قازاقستاننىڭ اەروپورتتارىندا قامتاماسىز ەتىلەدى»، - «قازاقستان اۆياسيالىق اكىمشىلىگى» اق اۆياسيالىق قاۋىپسىزدىك دەپارتامەنتىنىڭ ديرەكتورى دارحان قاتىشيەۆ.
كەمەدەگىنىڭ جانى ءبىر. ەندەشە قاۋىپسىزدىك باستى ورىندا. ازىرگە جولاۋشىلاردى تەكسەرۋ اۋەجاي قىزمەتشىلەرىنىڭ موينىندا. ەۋروپادا بۇل مىندەتتى ءبىرىڭعاي وپەراتور اتقارادى. سول ارقىلى اۋەجايلاردىڭ انتيتەررورلىق دەڭگەيى كوتەرىلگەن. مۇنىڭ ماڭىزى زور. وكىنىشكە قاراي، تىيىم سالىنعان زاتتاردى تاسىپ، «قول جۇگىمدە جارىلعىش زات بار» دەپ جالعان شۋ شىعاراتىن قيقار جولاۋشىلار دا كەزدەسەدى.
«تەكسەرىس پۋنكتىندە تۇرعان مامانداردىڭ ءوزىنىڭ قاعيدالارى بار، سول قاعيدالارى نەگىزىندە ءازىل رەتىندە «مەنىڭ قولجۇگىمدى بومبا بار» دەپ ايتىلعان سوزدەر ورىنسىز. سول ماماندار ءوز قاعيدالارىنا سايكەس ءوز شارالارىن قولدايدى. كەيبىر جولاۋشىلار پوليسيا پۋنكتىنە تاپسىرادى. كەيبىر جولاۋشىلاردى رەيستەن شەشۋى مۇمكىن. ال ءبىرىڭعاي وپەراتوردى العاشقى جىلدارى مەملەكەت قارجىلاندىرادى. كەيىنگى شىعىندار اۆياسيالىق الىم ەسەبىنەن وتەلەدى. بۇل بيلەت باعاسىنا ەش اسەر ەتپەيدى. ايتپاقشى، كەلەشەكتە قازاقستان مەن اقش اراسىندا تىكەلەي رەيستەر اشىلۋى مۇمكىن»، - دەيدى «قازاقستان اۆياسيالىق اكىمشىلىگى» اق اۆياسيالىق قاۋىپسىزدىك دەپارتامەنتىنىڭ ديرەكتورى دارحان قاتىشيەۆ.
ەلىمىزدىڭ گەوگرافيالىق اياسى كەڭەيە بەرەدى. مەملەكەتتىك ءبىرىڭعاي اۆياسيالىق قاۋىپسىزدىك ۇيىمى بۇل مۇمكىندىكتى ەسەلەي تۇسەتىنى ءسوزسىز.
تىركەۋدەن ءوتۋ ءۇشىن اۋەجايعا ەرتەرەك كەلۋ كەرەك. اسىققاندا ۇزاققا سوزىلاتىنداي كورىنەتىن تەكسەرۋ جۇمىستارى ءسىز بەن ءبىزدىڭ ساقتىعىمىز ءۇشىن ەكەنىن ەستەن شىعارماعان ءجون.