ەلىمىزدە 250 جاڭا مادەني نىسان سالىنادى.
بۇل ق ر اقپارات جانە قوعامدىق دامۋ ءمينيسترى ايدا بالايەۆانىڭ ايتقانى، دەپ حابارلايدى Almaty-akshamy.kz
«ەكىنشى باعىت «ەل رۋحى» دەپ اتالادى جانە مادەنيەت سالاسىندا قىزمەتتەردىڭ قولجەتىمدىگىن ارتتىرۋ بويىنشا ءىس-شارالار كەشەنىن قامتيدى، سونداي-اق شەتەلدە وتاندىق مادەني ءونىمدى دارىپتەپ، تانىمال ەتۋ ەسكەرىلگەن. بۇل ماقساتتا ىرىكتەلگەن 13 ءىس-شارا جانە 2025 جىلعا قاراي 5 ناقتى كورسەتكىشكە جەتۋ جوسپارلانعان»، - دەدى ايدا بالايەۆا.
وسى ورايدا ينفراقۇرىلىمدى دامىتۋ، ونىڭ ىشىندە جاڭا مادەني نىسانداردى سالۋ ارقىلى مادەنيەت سالاسىنىڭ قىزمەتىمەن اۋىلدار مەن شالعايداعى ەلدى مەكەندەردىڭ 92،5 پايىز تۇرعىنى قامتىلادى. مادەنيەت نىساندارىنا تۇرعىنداردىڭ بارۋىن ەكى ەسەگە ارتتىرۋ جوسپارلانعان. بۇل ماقسات ءۇشىن 250 جاڭا مادەني نىسان سالىنىپ، 1 200 نىسان كۇردەلى جوندەۋدەن وتكىزىلەدى.
ءمينيستردىڭ ايتۋىنشا، ەلدىڭ شىعارماشىلىق الەۋەتىن تىكەلەي قولداۋ ارقىلى وتاندىق مادەني ءونىمدى جاڭعىرتۋ جۇيەسى قۇرىلادى. سونىڭ ىشىندە كينوپروكاتتاعى وتاندىق فيلمدەردىڭ ۇلەسىن 25 پايىزعا دەيىن جەتكىزۋ، «قازاقانيماسيا» شىعارماشىلىق بىرلەستىگى بازاسىندا 40 انيماسيالىق فيلم جاساۋ ەسكەرىلگەن. مۇنىمەن قوسا، شىعارماشىلىق بولاشاعى بار تالانتتاردىڭ 150 جوباسىنا قولداۋ جاسالماق.
ايدا بالايەۆا ءوز سوزىندە «ە-culture.kz» ءبىرىڭعاي ەلەكتروندى پلاتفورما جوباسىنا توقتالدى. جوبا وتاندىق مادەنيەتتىڭ بارلىق جەتىستىكتەرىنە ەركىن رەجيمدە ونلاين تۇردە قول جەتكىزۋگە مۇمكىندىك بەرەدى.
«جەر شارىنىڭ كەز كەلگەن نۇكتەسىنەن، ۇيدەن شىقپاي-اق، ءبىزدىڭ مۇراجايلار مەن تەاترلارعا، كىتاپحانالارعا جانە باسقا دا مادەني كورىكتى جەرلەرگە بارۋعا بولادى»، - دەدى ۆەدومستۆو باسشىسى.