ف.دوستويەۆسكيي سەمەي قالاسىندا 5 جىل بويى جۇمىس ىستەگەن.
قازاقستان حالقى اسسامبلەياسىنىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ فەدور دوستويەۆسكييدىڭ 200 جىلدىعىنا ارنالعان اتاۋلى ءىس-شارا ۇيىمداستىرۋدى ۇسىندى، دەپ حابارلايدى Almaty-akshamy.kz
«قازاقستاندا ەتنيكاارالىق ديالوگ ءداستۇرىنىڭ تامىرى تەرەڭدە جاتىر. ماسەلەن، كورنەكتى زەرتتەۋشى پوتانين گريگوريي الەكسەيەۆيچتى الاش قايراتكەرلەرى "قۇرمەتتى اقساقال" دەپ اتاعان. ءپوتانيننىڭ قازاق تىلىندە سويلەگەنى، حالقىمىزدىڭ مادەنيەتىن، تۇرمىسىن جانە تاريحىن زەرتتەگەنى بەلگىلى. قازاقتىڭ تانىمال عالىمى شوقان ۋاليحانوۆپەن دوستىق قارىم-قاتىناستا بولعان. بيىل يۋنەسكو قامقورلىعىمەن شوقان ءۋاليحانوۆتىڭ تاعى ءبىر دوسى، الەم ادەبيەتىنىڭ كلاسسيگى دوستويەۆسكيي فەدور ءميحايلوۆيچتىڭ 200 جىلدىعى اتالىپ وتەدى. مەنىڭشە، ەلىمىزدىڭ تاريحي ورتالىقتارىنىڭ ءبىرى – سەمەيدە وسىناۋ داتانىڭ كۇنىنە وراي اتاۋلى ءىس-شارا ۇيىمداستىرۋ كەرەك»، - دەدى مەملەكەت باسشىسى.
ف.دوستويەۆسكيي سەمەي قالاسىندا 5 جىل بويى جۇمىس ىستەگەن. قالادا جازۋشىنىڭ ادەبي-مەموريالدى مۋزەيى ورنالاسقان. وسى مۋزەي-ۇي بۇكىل الەم تۋريستەرى ءۇشىن مادەني-تانىمدىق نىسانعا اينالا الادى.
«مادەنيەتتەردىڭ بىر-بىرىمەن ارالاسۋىندا شەكارا جوق. ول حالىقتى رۋحاني بايىتادى. بۇل مەنىڭ نىق سەنىمىم. قازاقستاندا الەكساندر پۋشكيننەن باستاپ «ەدىلدە كازاكپىن، جايىقتا قازاقپىن» دەپ ايتقان نوبەل سىيلىعىنىڭ لاۋرەاتى ميحايل شولوحوۆقا دەيىن ورىس ادەبيەتىنىڭ كوپتەگەن كلاسسيگى شابىت العان ەدى»، - دەدى قاسىم-جومارت توقايەۆ.