مەملەكەت باسشىسى ەلوردانىڭ ينجەنەرلىك ينفراقۇرىلىمىن دامىتۋعا جاۋاپتى ادامدار جۇمىسىن ادال اتقارماعانىن ايتتى
ەلوردانى دامىتۋ ماسەلەلەرى جونىندە كەڭەستە مەملەكەت باسشىسى ەلورداداعى اۋىز سۋ تاپشىلىعى ماسەلەسىنە ايرىقشا توقتالىپ ءوتتى، دەپ حابارلايدى Almaty-akshamy.kz اقورداعا سىلتەمە جاساپ.
«استانانى سۋمەن قامتاماسىز ەتۋ وتە ماڭىزدى مىندەت. جازدىڭ باسىندا سۋ تاپشىلىعى قاتتى سەزىلدى. بۇعان تۇرعىندار نارازىلىق بىلدىرگەنىن بىلەسىزدەر. ءتىپتى، جولداردى بوگەپ، ميتينگكە شىقتى. بۇل – ەلوردا ومىرىندە بولىپ جاتقان كەلەڭسىز وقيعالار. اشىعىن ايتساق، قالانىڭ ينجەنەرلىك ينفراقۇرىلىمىن دامىتۋعا جاۋاپتى ادامدار جۇمىسىن ادال اتقارماعان. بۇل – ناعىز سالعىرتتىق، سونىڭ سالدارىنان وسىنداي كۇردەلى احۋال قالىپتاستى. مۇنى، ءتىپتى، جۇمىسقا سەلقوس قاراۋ ەمەس، قاساقانا زيان كەلتىرۋ دەۋگە بولادى. سەبەبى، سۋ، جىلۋ، جارىق – كۇندەلىكتى تۇرمىستاعى اسا ماڭىزدى قاجەتتىلىكتەر. بۇل سالادا قاتەلىككە مۇلدەم جول بەرۋگە بولمايدى. سوندىقتان كىنالى ادامدار ءتيىستى جازاسىن الۋى كەرەك»، - دەدى قاسىم-جومارت توقايەۆ.
ول ءقازىر ەلوردا استانا سۋ قويماسىنا تولىق تاۋەلدى بولىپ وتىرعانىن ايتتى.
«سۋ الاتىن باسقا جەر جوق. بۇل – وتە ءقاۋىپتى. كەز كەلگەن ساتتە وقىس وقيعا بولسا، بۇكىل قالاعا ءقاۋىپ ءتونۋى مۇمكىن. تۇرعىندار سانى كوبەيىپ، جاڭا نىساندار پايدالانۋعا بەرىلىپ جاتىر. سوندىقتان سۋ قويماسىنىڭ قۋاتى الداعى بىر-ەكى جىلدا سارقىلىپ بىتەتىنى انىق»، - دەدى ق. توقايەۆ.