«تۇرعىن ءۇي قۇرىلىسىن رەتكە كەلتىرۋ قاجەت». ەلوردانى دامىتۋ ماسەلەلەرى جونىندە كەڭەستە قاسىم-جومارت توقايەۆ وسىلاي دەدى، دەپ حابارلايدى Almaty-akshamy.kz.
«قازىرگى تاڭدا استانادا 10 ميلليون شارشى مەترگە جۋىق تۇرعىن ءۇي سالىنىپ جاتىر. وكىنىشكە قاراي، قۇرىلىس قارقىنى جوعارى بولعانىمەن، ساپاعا كوڭىل بولىنە بەرمەيدى. بۇل سالادا ولقىلىقتار وتە كوپ. قالانى كوركەيتىپ، جۇرتقا قولايلى جاعداي جاساۋ باستى نازاردا بولۋعا ءتيىس. الايدا، جەكەلەگەن قۇرىلىس كومپانيالارىنىڭ مۇددەسى باسىم ءتۇسىپ جاتادى. قالانى دامىتۋ ىسىندە بىرىزدىلىك بولماعان سوڭ، ورىنسىز قۇرىلىس كوبەيىپ كەتتى. الەۋمەتتىك نىساندار مەن قوعامدىق ورىندار بولۋعا ءتيىس جەرلەردە تۇرعىن ءۇي كەشەندەرى سالىندى»، - دەپ اتاپ ءوتتى پرەزيدەنت.
مەملەكەت باسشىسى شەنەۋنىكتەر قۇرىلىس سالاسىندا بايقالعان پروبلەمالارعا كوز جۇمىپ قاراماۋى ءتيىس ەكەنىن ەسكەرتتى.
«قۇرىلىس – ەكونوميكانىڭ وتە ماڭىزدى سالاسى. بۇعان داۋ جوق. استانادا قۇرىلىس كوپ بولعاندىقتان، قوماقتى قارجى بولىنەتىنى بەلگىلى. سوندىقتان، ادال كاسىپكەرلەرمەن قاتار، ءتۇرلى الاياقتار دا پايدا كورىپ قالۋعا تىرىسادى. كەيبىر كومپانيالار قۇرىلىس جۇرگىزۋگە رۇقسات بەرەتىن قۇجاتتارى بولماسا دا، جۇمىس ىستەپ جاتىر. بيزنەستى تەكسەرۋگە سالىنعان تىيىمدى، ياعني ءموراتورييدى جەلەۋ ەتەدى. سونداي-اق ۇلەسكەرلەردەن زاڭسىز قاراجات جينايدى. بۇل – وتە ءقاۋىپتى ءۇردىس. اكىمدىك قۇقىق قورعاۋ ورگاندارىمەن بىرلەسىپ، بۇل ۇردىسكە توسقاۋىل قويۋى كەرەك. مۇنىڭ ءبارى جاڭا پروبلەمالىق نىسانداردىڭ پايدا بولۋىنا اكەپ سوقتىرادى. اكىمدىك كوز جۇمىپ وتىرا بەرسە، بۇل ماسەلە ۋشىعىپ كەتەدى. شەنەۋنىكتەردىڭ مۇنداي سالعىرتتىعى جانە جاۋاپسىزدىعى ۇلتتىق قاۋىپسىزدىككە نۇقسان كەلتىرۋى مۇمكىن. سوندىقتان، بارلىق سالادا، سونىڭ ىشىندە قۇرىلىس سالاسىندا زاڭ مەن ءتارتىپ بولۋعا ءتيىس. مەن زاڭسىز قۇرىلىسقا جول بەرمەۋ ءۇشىن باقىلاۋدى كۇشەيتىپ، سالانى رەتتەۋدى تاپسىردىم»، - دەدى قاسىم-جومارت توقايەۆ.
پرەزيدەنت بۇگىندە استانادا 4 مىڭعا جۋىق ۇلەسكەر باسپاناعا قول جەتكىزە الماي جۇرگەنىنە توقتالدى.
«بۇل – وتكىر ماسەلە. ونى شەشۋ ءۇشىن باتىل قادامدار جاساۋ قاجەت. ءقازىر بۇل باعىتتا اتقارىلىپ جاقتان جۇمىستار جەتكىلىكسىز. بيىل ۇلەسكەرلەرى بار 16 ءۇيدىڭ قۇرىلىسىن اياقتاۋ كەرەك. جىل سوڭىنا دەيىن بۇل ماسەلە تولىق شەشىمىن تابۋعا ءتيىس. وسىنداي قۇرىلىستاردىڭ قايتا پايدا بولۋىنا جول بەرمەۋ قاجەت. مەن قاڭتارداعى جيىندا ەسكى جانە اپاتتى جاعدايداعى ۇيلەرگە قاتىستى كەڭىرەك توقتالدىم. ەلوردانىڭ تۇرعىن ءۇي قورى ەسكىرىپ بارادى. بۇل – اسىرەسە، شەتكەرى ورنالاسقان جەكە سەكتورعا قاتىستى ماسەلە. كوپتەگەن ازامات اپاتتى جاعدايداعى باسپانادا تۇرىپ جاتىر. مۇنداي عيماراتتاردى ءسۇرىپ تاستاپ، ورنىنا جاڭا ۇيلەر سالۋ قاجەت. بۇل – وتە اۋقىمدى جۇمىس. باستاپقى كەزەڭدە بۇل جۇمىسقا مەملەكەت اتسالىسۋى قاجەت. شەتەلدە مۇنداي ءتاسىل كەڭىنەن قولدانىلادى. سونداي-اق، بۇل ىسكە مىندەتتى تۇردە بيزنەستى تارتۋ كەرەك. تۇرعىن ءۇي قورىن جاڭارتۋدىڭ باسقا جولى جوق»، - دەدى ول.