ەگەر ءسىز جەڭىلدىك ساناتىنىڭ وكىلى بولا تۇرىپ، مەملەكەتتىك باج سالىعىن قاتەلەسىپ تولەسەڭىز، بۇل جاعدايدا اقشاڭىزدى قايتارا الاسىز.
حقكو-لاردا قۇجاتتاندىرۋ قىزمەتتەرىن الۋ كەزىندە سالىق كودەكسىنە سايكەس، كليەنتتەردىڭ بەلگىلى ءبىر ساناتى مەملەكەتتىك باج تولەۋدەن بوساتىلادى، دەپ حابارلايدى Almaty-akshamy.kz
قۇجاتتاندىرۋ قىزمەتتەرىنىڭ قاتارىندا پاسپورت، جەكە كۋالىك، تۇرۋ ىقتيارحاتى جانە ازاماتتىعى جوق ادامنىڭ كۋالىكتەرىن بەرۋ بار. كودەكستەگى 622-باپ، 4-تارماق بويىنشا مەملەكەتتىك باج تولەۋدەن بوساتىلاتىندار:
- ۇوس ارداگەرلەرى جانە ولارعا تەڭەستىرىلگەن تۇلعالار؛
- كەڭەس وداعىنىڭ باتىرلارى جانە سوسياليستىك ەڭبەك ەرلەرى؛
- بارلىق توپتاعى مۇگەدەكتەر، سونداي-اق مۇگەدەك بالانىڭ اتا-اناسىنىڭ ءبىرى؛
- مۇگەدەكتەر مەن قارتتارعا ارنالعان مەكەمەلەردە تۇراتىن ەگدە جاستاعى ادامدار؛
- جەتىم بالالار جانە بالالار ۇيلەرىندە نەمەسە ينتەرناتتاردا تۇراتىن، اتا-اناسىنىڭ قامقورلىعىنسىز قالعان بالالار؛
- «باتىر انا» اتاعىنا يە بولعان، «التىن القا» جانە «كۇمىس القا» توسبەلگىلەرىمەن ناگرادتالعان كوپبالالى انالار؛
- چەرنوبىل اپاتىنىڭ سالدارىنان زارداپ شەككەن ازاماتتار»، - دەپ جازدى ۆەدومستۆودان.
بۇل ساناتتاعى تۇلعالار پاسپورت نەمەسە جەكە كۋالىك الۋ ءۇشىن حقكو-عا جۇگىنگەن كەزدە مەملەكەتتىك باج تولەمەۋى ءتيىس.
«ەگەر ءسىز جەڭىلدىك ساناتىنىڭ وكىلى بولا تۇرىپ، مەملەكەتتىك باج سالىعىن قاتەلەسىپ تولەسەڭىز، بۇل جاعدايدا اقشاڭىزدى قايتارا الاسىز. ول ءۇشىن، ەڭ الدىمەن، ءىىم اۋماقتىق ورگانىنا جۇگىنىپ، جەڭىلدىك ساناتىن راستايتىن قۇجاتتى ۇسىنۋ قاجەت. ورگان سىزگە تولەنگەن تۇبىرتەكتىڭ تالاپ ەتىلمەگەنى تۋرالى انىقتاما بەرەدى. بۇل انىقتامامەن حقكو-عا جۇگىنۋ كەرەك نەمەسە سوممانى قايتارۋ ءۇشىن eGov ارقىلى ءوتىنىم بەرۋ قاجەت. ءوتىنىش قابىلدانعاننان كەيىن 5 جۇمىس كۇنى ىشىندە كليەنتتىڭ شوتىنا قاتە تولەنگەن سوما تۇسەدى»، - دەپ تۇسىندىرىلگەن حابارلامادا.