الماتى قالاسىندا قازاقستاننىڭ شاحمات قوعامداستىعىنىڭ ۇزدىك وكىلدەرىنە KazChess Awards ماراپاتىن تابىستاۋ ءراسىمى ءوتتى. بۇل ماراپات العاش رەت ۇيىمداستىرىلىپ وتىر.
سونىمەن، قازاقستان شاحماتىنىڭ مىقتىلارى:
- «ايەلدەر اراسىندا جىل سپورتشىسى» – ايەلدەر اراسىندا جىلدام شاحماتتان ەكى دۇركىن الەم چەمپيونى ءبيبىسارا اساۋبايەۆا؛
- «ەرلەر اراسىندا جىل سپورتشىسى» – ەرلەر اراسىندا بليستەن ازيا چەمپيونى رينات جۇمابايەۆ؛
- «جىل كوشباسشىسى» – 44ء-شى حالىقارالىق شاحمات وليمپياداسىنىڭ قولا جۇلدەگەرى جانسايا ابدىمالىك؛
- «جىل ۇزدىگى» – ايەلدەر اراسىندا جىلدام شاحماتتان ۆيسە-چەمپيونى دينارا ءسادۋاقاسوۆا؛
- «جىل جاڭالىعى» – 18 جاسقا دەيىنگى جىلدام شاحماتتان الەم چەمپيونى نوگەربەك قازىبەك؛
- «جىل ءۇمىتى» – 14 جاسقا دەيىنگى قىزدار اراسىندا جىلدام شاحماتتان الەم چەمپيونى زارينا نۇرعالييەۆا؛
- «جىل ۇيىمداستىرۋشىسى» – الماتى وبلىسى جانە جەتىسۋ وبلىسىنىڭ شاحمات جانە ۇستەل ويىندارى فەدەراسياسىنىڭ پرەزيدەنتى سايات ەگەمبەردييەۆ؛
- «جىل باپكەرى» – ازيا جانە ق ر چەمپيوندارىنىڭ جانە چەمپيونات جەڭىمپازدارىنىڭ جەتەكشىسى ەرجان شاكەنوۆ؛ «جىل تورەشىسى» – حالىقارالىق كلاستى سۋديا ولەگ ريناس.
تاقىرىپقا وراي
قازاقستان شاحمات فەدەراسياسىنىڭ پرەزيدەنتى تيمۋر تۋرلوۆ سالتاناتتى ءراسىمنىڭ العىسوزىندە ماراپات يەلەرىن قۇتتىقتادى.
«وتكەن ماۋسىم بويى ءبىزدىڭ سپورتشىلار كەرەمەت ناتيجەلەر كورسەتتى. ءاربىر جەڭىستىڭ ارتىندا اتا-انا، باپكەرلەر شتابى جانە سپورتشىلاردىڭ وزدەرى اتقارعان قاجىماس ەڭبەك جاتىر. ولار جەتىستىكتەرىمەن قازاقستاننىڭ ابىرويىن الەمدىك ارەنادا اسقاقتاتۋدا. ءبىراق ودان دا ماڭىزدىسى – وسكەلەڭ ۇرپاقتى شاحماتپەن اينالىسۋعا ءارى بۇدان دا وراسان زور جەڭىستەرگە قول جەتكىزۋگە ىنتالاندىرىپ، ولارعا ناعىز ۇلگى بولىپ كەلەدى. بۇل ماراپات – ءبىزدىڭ ەلىمىزدە شاحماتتى دامىتۋ مەن قولداۋ بويىنشا اۋقىمدى ءارى كەشەندى جۇمىستاردىڭ ءبىر بولىگى. سول ارقىلى ءبىز كورنەكتى سپورشىلارىمىزدىڭ اراسىنان ءالى-اق ناعىز ساڭلاقتاردى تاربيەلەپ شىعارامىز»، – دەدى ت.تۋرلوۆ.
ول ەلوردادا بيىلعى 7 ءساۋىر مەن 1 مامىر ارالىعىندا وتەتىن شاحماتتان فيدە الەم چەمپيوناتىنىڭ ماڭىزدىلىعىن دا اتاپ ءوتتى. الەمنىڭ ەڭ مىقتىلارىنىڭ وسىناۋ جەكپە-جەگى اتالعان سپورت ءتۇرىن ءبىزدىڭ ەلىمىزدە تانىمال ەتۋگە ىقپال ەتەدى دەپ سەنىم ءبىلدىردى.