كيىز ۇيگە سۇرانىس كوبەيگەن

تەمىردەن ءتۇيىن تۇيگەن شەبەرلەر.

تۇركيادا جەر سىلكىنىسىنەن جاپا شەككەندەرگە قازاقستاننان جىبەرىلگەن كيىز ۇيلەردىڭ ءبىرازى جەتىسۋ وبلىسىندا جاسالدى.ناقتىراق ايتقاندا، كوكسۋ اۋدانىنىڭ مۇقىرى اۋىلىندا ازىرلەندى. ۇلتتىق قۇندىلىعىمىزدى قازىرگى زامانعا ساي بەيىمدەگەن ءوندىرىس ورنىندا 30 ادام جۇمىس ىستەيدى، دەپ حابارلايدى Almaty-akshamy.kz 24.kz-كە سىلتەمە جاساپ.

كيىز ءۇي جاساۋشىلار كۇنىنە ءۇش ءۇي قۇراستىرادى. ۋىعىن ءيىپ، كەرەگەسىن دانەكەرلەپ، جابىندىلارىن دا تىگەدى. كيىز ءۇيدىڭ شاڭىراعى مەن كەرەگەسىن دانەكەرلەپ، ۋىعىن يۋ - ازات باعداتتىڭ مىندەتى. تەمىر ۇستاسى كۇنىنە ءبىر ءۇيدىڭ بولشەكتەرىن دايىندايدى. قۇراستىرىلعان مۇنداي باسپانانىڭ وزىندىك ارتىقشىلىعى بار، - دەيدى شەبەر. 

«بۇل ءتورت بۇرىشتى ترۋبا بولعاننان كەيىن جەڭىل بولادى. الىپ جيناعانعا قولايلى. تەز تىگىلەدى، تەز قۇرالادى دەگەن سەكىلدى. تەز قايتادان بۇزا سالۋعا بولادى. وتە قولايلى»، - دەيدى دانەكەرلەۋشى ازات باعدات.

شەبەرحانادا كيىز ءۇيدىڭ جابىندارى دا تىگىلەدى. وعان كيىزبەن قاتار ماقتا جانە سۋ وتكىزبەيتىن برەزەنت قولدانىلادى. ال ويۋ-ورنەكتەر ارنايى تاپسىرىسپەن ماتاعا باسىلادى.

«شىدامدىلىعى بىلاي ونداعان جىلدارعا جەتەدى. ءبىر قازاق ۇيگە 150 مەتر ماتا كەتەدى. جانە مىنا شەكپەننەن 150 مەتر كەتىپ قالادى. ءبىز 8 مەترلىك، 10 مەترلىك ءۇي تىگىپ جاتىرمىز»، - دەيدى شەبەرحانا مەڭگەرۋشىسى جولدىحان زياۋتدين قىزى. 

ءوندىرىس ورنى جەتى جىلدان بەرى جۇمىس ىستەيدى. شەبەرلەر قولىنان شىققان 34 كيىز ءۇي باۋىرلاس تۇركياعا جىبەرىلگەن.