بۇرىنىراقتا، بالالىق شاقتارى 80-90 جىلدارى وتكەن قازىرگى اعا-اپكەلەرىمىزدىڭ ەسىندە بولار، انالارىمىز كيىم السا، اسىرەسە، سىرت كيىمدى دەنەگە شاپ-شاق قىلماي، كەڭدەۋ ەتىپ، 1-2 ولشەمگە ۇلكەندەۋ ەتىپ الاتىن. ونىسى ءسان ەمەس، «كەلەر جىلى دا كيە بەرەدى» دەگەن جەلەۋمەن الىناتىن. ءسويتىپ، ءبىر پالتونى بىرنەشە ماۋسىم كيىپ جۇرە بەرەتىن كۇندەر كەلمەسكە كەتتى.
دەسە دە، ءسان الەمى ماۋسىم سايىن، ءتىپتى كۇن سايىن وزگەرىپ جاتادى. بۇرىن قولبىراتىپ، سالپيتىپ كيىپ الۋعا نامىستانساق، ءقازىر ءوز ولشەمىڭنەن ۇلكەن كيىمدى كيۋ، كەرىسىنشە، سانگە اينالدى. مۇنى كيىم كيۋ ستيلىندەگى وۆەرسايز دەپ اتايدى. وۆەرسايز وسىدان بىرنەشە جىل بۇرىن كوپتەگەن ءسانقويلاردىڭ جۇرەگىن جاۋلاپ ۇلگەردى جانە ءوز پوزيسياسىن بەرەر ەمەس. ءسان وزگەرسە دە، بۇل ستيل جىل وتكەن سايىن كوپشىلىك جاقسى كورىپ كيەتىن، تانىمال بولا ءتۇستى. ەڭ باستىسى، وۆەرسايز ەركىن قوزعالىس پەن ءوز بولمىسىڭدى كورسەتۋدىڭ ءبىر جولى رەتىندە كورىنىس تاپتى. سەبەبى بۇل ستيلدەگى كيىم ءوزىڭدى قولايلى ءارى ءستيلدى سەزىنۋگە مۇمكىندىك بەرەدى.
كيىم كيۋدەگى وۆەرسايز دەگەن نە؟
بۇل اتاۋ بىزگە اعىلشىننىڭ oversize دەگەن سوزىنەن، ياعني، «وتە ۇلكەن» دەگەنىنەن كەلگەن. ءسان سالاسىندا بۇل تەرمين كەڭ ءپىشىمدى زاتتاردى ءبىلدىرۋ ءۇشىن قولدانىلادى. بۇل ستيلدەگى كيىم كولەمدى بولعاننان كەيىن ءوزىنىڭ ەمەس، وزگەنىڭ يىعىندا تۇرعانداي كورىنەدى. قاراپايىم، ءارى كۇندەلىكتى ومىردە ىڭعايلى كيىنگىسى كەلەتىندەرگە وۆەرسايز ءستيلىنىڭ ۇنارى ءسوزسىز.
وۆەرسايزدى قالاي كيۋ كەرەك؟
«بوياۋشى، بوياۋشى دەگەن ساقالىن بوياپتى» دەگەننىڭ كەرى بولماس ءۇشىن، ءسان ەكەن دەپ كەلسىن، كەلمەسىن ۇستىمىزگە جاپسىرا سالعان بولا قويماس. ءار سالانىڭ ءوز ماماندارى مەن شەبەرلەرى بار دەگەندەي. سوندىقتان كەز كەلگەن كيىمدى جاراسىمدى ەتىپ كيۋ ءۇشىن ستيليستەردىڭ دە ايتارىنا قۇلاق اسۋ كەرەك. وسى ستيلدە كيىنۋ ءۇشىن نەگە ءمان بەرىپ، نەنى بىلگەن ءجون:
- جيىنتىقتا (كومپلەكت) ءبىر عانا كولەمدى كيىم بولعانى ءجون، سول كەزدە وبراز الدەقايدا ۇيلەسىمدىرەك كورىنەدى.
- مينيماليزم ءستيلى اسا سالماق سالماي، كوزگە وعاش كورىنبەيتىن وۆەرسايز وبرازىن جاساۋعا جاقسى جاراسادى.
- كولەمدى كيىم ارتىق سالماقتى جاسىرمايدى، كەرىسىنشە، ونى ودان دا ۇلكەن ەتىپ كورسەتەدى.
- وۆەرسايز ءۇشىن ەڭ ۇتىمدى تۇستەر مونوحرومدى نەمەسە باسقا دا كوزگە ءبىر قاراعاندا جايلى رەڭكتەر ءساتتى بولادى. ال ەگەر كيىمنىڭ ءتۇسى وتە اشىق نەمەسە ءپرينتتى بولسا، بۇل كيىم جيىنتىعىندا باسقا كيىمدەردىڭ بەيتاراپ بولۋىنا ءمان بەرىڭىز.
كيىمدى رەتپەن، سانمەن، جاراستىرا كيە ءبىلۋ دە – ونەر. بۇگىندە جاستىڭ دا، كارىنىڭ دە كوڭىلىنەن شىققان وۆەرسايز باتىستان كەلگەن ستيل بولسا دا، تىرىستىرىپ كيىنىپ جۇرگەننەن كورى كەڭىنەن، مولىنان بولعاننان كەيىن دە ءقازىر ءبىراز ادامنىڭ جاپپاي كيىنۋ سانىنە اينالعان بولار. ادام كوركى – شۇبەرەك. سوندىقتان، زامان قانشا دامىپ كەتسە دە، ەتەك-جەڭىمىزدى جاباتىن، بويعا ادەمى قوناتىن كيىمنەن الىستامايىق.