كيىكتەردى اتۋعا رەسمي تۇردە رۇقسات بەرىلدى.
ۇكىمەت قاۋلىسى ءبىر اي بۇرىن قابىلدانىپ قويعانىن ماجىلىسمەن دۇيسەنباي تۇرعانوۆ راستادى، دەپ حابارلايدى Almaty-akshamy.kz Ktk.kz-كە سىلتەمە جاساپ.
ءبىراق كيىكتىڭ ەتىن، ءمۇيىزىن قالاي پايدالاناتىنى ازىرگە پىسىقتالماعان. ەكى جىلدان بەرى سوزبالاڭعا سالىنىپ كەلگەن ماسەلەگە قاتىستى تۇپكىلىكتى شەشىمنىڭ قابىلدانعانىن ەكولوگيا مينيسترلىگى ازىرگە حابارلاعان جوق.
«حابارىم بار. رەسمي تۇردە رۇقسات بەرىلگەن. وسى ايدىڭ باسىندااۋ دەيمىن. 300 مىڭعا جۋىق كيىكتى اتۋعا بولادى دەگەن. ءبىراق ءادىسىن دە، سودان كەيىن ەتىن، ءمۇيىزىن قايدا جىبەرەتىنىن، قالاي پايدالاناتىنى سول ءالى شەشىلمەگەن سىڭايلى»، - دەدى ءماجىلىس دەپۋتاتى دۇيسەنباي تۇرعانوۆ.
سوڭعى ساناق بويىنشا ەلىمىزدەگى اقبوكەن سانى 2 ميلليونعا جەتىپ جىعىلعان. اسىرەسە باتىس ايماقتارداعى شارۋالاردىڭ ەگىستىگىن وتاپ، بەرەكەسىن العاننان كەيىن پرەزيدەنت جاۋاپتى ۆەدومستۆاعا ءتيىستى شەشىم شىعارۋدى تاپسىرعان-دى. ودان بەرى سالاعا جاۋاپتى مينيستر ەكى رەت اۋىسىپ ۇلگەردى. ەكولوگيا مينيسترلىگى شەتەلدەن عالىمدار الدىرىپ، تالقىلايمىز دەگەنشە، بيىل وبلىس شارۋالارىنا كيىكتەن كەلگەن زالال 8 ميلليارد تەڭگەگە جۋىقتاعان. اقبوكەندەر 1 ميلليون 284 مىڭ گەكتار جايىلىم-شابىندىقتى تاپتاپ، 5 مىڭ گەكتار ەگىندى وتاپ كەتىپتى. ءقازىر ءتيىستى ەسەپ-قيساپ ۇكىمەتكە جىبەرىلگەن.
«سول ءوزىنىڭ اۋماعىنا جاقىن ءۇش ەت كومبيناتىمەن ازىرلىكتەرى پىسىقتالۋدا. بۇل ءۇش كومبينات تاۋلىگىنە 1900 باسقا دەيىن سويا الاتىن مۇمكىندىكتەرىن كورسەتىپ وتىر. توڭازىتقىش كامەرالارى 4 مىڭ توننالىق ىستەپ تۇرعان. بۇل جاڭاقالاداعى ەت توڭازىتۋ كومبيناتى جانە اقجايىق اۋدانىندا ورنالاسقان ەت سويۋ ورنى. ەندى ونىڭ ار جاعىندا وڭدەۋ جۇمىسى كۋبلەيدە. ەرتەڭ بۇل باستالعان ۋاقىتتا سوندا وڭدەلەتىن بولادى»، - دەدى بقو اۋىل شارۋاشىلىعى باسقارماسىنىڭ باسشىسى ناۋرىزباي قاراعويشين.
.