كيبەرقىلمىس جاسادى دەگەن كۇدىكپەن ءبىر توپ ۇستالدى

ولار - قازاقستان مەن رەسەي ازاماتتارى.

پوليسەيلەر ينتەرنەت-الاياقتىق جاسادى دەگەن كۇدىككە ىلىنگەن 15 ادامنان تۇراتىن قىلمىس توبىن ۇستادى، دەپ حابارلايدى Almaty-akshamy.kz Polisia.kz سايتىنا سىلتەمە جاساپ.

13-22 ماۋسىم ارالىعىندا پاتەرىن ساتقان الماتى تۇرعىنى الاياقتار ايلاسىنا ءتۇسىپ قالدى. ول ساتىلىمنان تۇسكەن 23 ميلليون تەڭگەنى بىرنەشە ترانشپەن الاياقتاردىڭ ەسەپشوتىنا اۋدارعان. جابىرلەنۋشى 24 ماۋسىمدا قۇقىق قورعاۋ ورگاندارىنا جۇگىنگەن.

الماتى قالاسى پد المالى اۋدانى پوليسيا باسقارماسىنىڭ دەرەگىنە سايكەس، ق ر قك 190-بابى 4-بولىگىندە («اسا ءىرى مولشەردەگى الاياقتىق») كوزدەلگەن قىلمىستىق قۇقىق بۇزۋشىلىق قۇرامىنىڭ بەلگىلەرى بويىنشا سوتالدى تەرگەۋ باستالدى.

سول كۇنى تەرگەلىپ جاتقان ءىس اياسىندا ءىىم كريمينالدىق پوليسيا دەپارتامەنتى مەن الماتى پد تاجىريبەلى قىزمەتكەرلەرىنەن ارنايى جەدەل-تەرگەۋ توبى قۇرىلدى. جەدەل ىزدەستىرۋ جانە تەرگەۋ ءىس-شاراسى بارىسىندا قازاقستاننىڭ ءتۇرلى قالاسىندا تۇراتىن جالعان تۇلعالارعا راسىمدەلگەن 10-عا جۋىق بانك كارتاسى پايدالانىلعانى انىقتالدى.

ق ر ءىىم كيبەرقىلمىسپەن كۇرەس باسقارماسى جەدەل قىزمەتكەرلەرى پاۆلودار وبلىسى جانە الماتىداعى ارىپتەستەرىمەن بىرلەسىپ، 15 ادامنان تۇراتىن قىلمىس توبىن ۇستادى. ولار ينتەرنەت جەلىسىندە الاياقتىق جاسادى دەگەن كۇدىككە ءىلىنىپ، تۇتقىندالدى.

ءقازىر توپ مۇشەلەرى ينتەرنەتتەگى الاياقتىقتىڭ التى ەپيزودىنا قاتىسى بولۋى مۇمكىن ەكەنى انىقتالدى، كەلتىرگەن زالال قۇنى 106 ميلليون تەڭگەدەن اسادى.