سىبايلاس جەمقورلىققا قارسى قىزمەت بيزنەستى قورعاۋ اياسىندا تاراز قالاسىنىڭ تۇرعىنىن الاياقتىق جانە پارا بەرۋگە يتەرمەلەۋ كۇدىگى بويىنشا ۇستادى، دەپ حابارلايدى Almaty-akshamy.kz.
ول مەملەكەتتىك ورگانمەن ماسەلەنى شەشۋ سىلتاۋىمەن شەتەلدىك كومپانيانىڭ وكىلىن جاڭىلىستىرىپ، جوعارى لاۋازىمدى تۇلعالارمەن كەزدەسۋدى ۇيىمداستىرۋعا كومەكتەسكەنى ءۇشىن 200 000 اقش دوللارى كولەمىندە اقشا قاراجاتىن يەمدەنگەن.
سونىمەن قاتار، كۇدىكتى كەلىسىمشارتقا قول قويىلعان جاعدايدا كەلىسىم سوماسىنىڭ ءۇش پايىزى مولشەرىندە اقشا تالاپ ەتكەن.
سونداي-اق، سىبايلاس جەمقورلىققا قارسى قىزمەت الاياقتىق جاسادى دەگەن كۇدىكپەن الماتى قالاسىنىڭ تۇرعىنىن ۇستادى. ول قورعانىس مينيسترلىگىنىڭ ۆەدومستۆولىق باعىنىستى ۇيىمىنا جۇمىسقا ورنالاسۋ ماسەلەسىن شەشۋدى سىلتاۋراتىپ، ءىس جۇزىندە نيەتى جوق بولا تۇرا 100 000 اقش دوللارىن تالاپ ەتكەن، دەپ جازدى قازاقپارات.
اقشانى العاننان كەيىن اتالعان كۇدىكتىلەر ۇستالىپ، سوتتىڭ سانكسياسىمەن قاماۋعا الىندى.
ق ر قپك 201-بابىنا سايكەس تەرگەۋ مۇددەسى ءۇشىن وزگە اقپارات جاريا ەتۋگە جاتپايدى.