بەيجىڭگە بارعان بلينكەن جۇڭگو باسشىسىمەن كەزدەستى. بۇل ونىڭ جۇڭگو ساپارىنا جاڭا سيپات بەردى جانە ەكى ەلدىڭ قايشىلىقتى رەتتەۋگە دەگەن قۇلشىنىسىن اڭعارتتى.
كەزدەسۋدىڭ بولاتىنى جايىندا اقپارات قۇرالدارىنا ءبىر ساعات بۇرىن عانا حابارلانعان.
جۇڭگو باسشىسى سي سزينپين اقش مەملەكەتتىك حاتشىسى ەتنوني بلينكەندى 19 ماۋسىم تۇسكەن كەيىن بۋمەن كونفەرەنس-زالىندا قابىلدادى.
بۇدان بۇرىن بلينكەن قىتايدىڭ قازىرگى سىرتقى ىستەر ءمينيسترى سين گانمەن جانە سىرتقى ساياسات بويىنشا جوعارى لاۋازىمدى تۇلعاسى ۆان يمەن كەزدەسكەن بولاتىن.
ساراپشىلار، ۆان يمەن كەزدەسۋدىڭ ناتيجەسى بلينكەننىڭ سي سزينپينمەن كەزدەسۋىن نەمەسە كەزدەسپەۋىن بەلگىلەيدى دەپ بولجاعان. قازىرگى جاعدايدان قاراعاندا ۆان ي مەن بلينكەن اسا نازىك ماسەلەلەر بويىنشا پىكىر الشاقتىعىن قىسقارتقانداي.
ۆان-بلينكەن كەزدەسۋىنىڭ مازمۇنى ەندى عانا جاريالانىپ جاتىر. سونىڭ وزىندە ءۇش ساعاتتىڭ ديالوگتىڭ تولىق مازمۇنى ب ا ق ءۇشىن قولجەتىمسىز. تەك، سينحۋا اگەنتتىگى حابارىندا ۆان ءيدىڭ كەزدەسۋدە ايتقان سوزدەرىن كەلتىرەدى. ونىڭ پىكىرىنشە، قىتاي-اقش قايشىلىعىنىڭ تۇپكى سەبەبى – اقش-تىڭ قىتايعا قاتىستى قاتە تۇسىنىگى جانە قىتايعا قاتىستى قاتە ساياسات جۇرگىزۋى ەكەن.
ول اقش تاراپىنان «جۇڭگو ءقاۋپى تەورياسىنان» باس تارتىپ، قىتايدىڭ تەحنولوگيالىق دامۋىنا كەدەرگى كەلتىرمەۋدى، ىشكى ىستەرىنە ورىنسىز ارالاسپاۋدى سۇراعان. بۇعان قوسا تايۆان ماسەلەسىندە جۇڭگو ىمىراعا كەلە المايدى دەگەن سىڭايدا ۇستانىمدارىن جەتكىزگەن.