كۋرستار قازاق جانە ورىس تىلىندە جۇرگىزىلەدى، ۇزاقتىعى – 72 ساعات.
ەڭبەك مينيسترلىگىنىڭ جوباسى ارقىلى Skills Enbek ءبىلىم بەرۋ پلاتفورماسىندا ءار ءتۇرلى تەگىن كۋرستاردى وقۋعا بولادى، دەپ حابارلايدى Almaty-akshamy.kz
مىسالى Data Scientist كۋرسىن دەرەكتەر عىلىمى سالاسىن مەڭگەرگىسى كەلەتىندەرگە وقۋعا بولادى. كۋرس قاتىسۋشىسى دەرەكتەردى جيناۋ، وڭدەۋ جانە تالداۋ داعدىلارىن، ماشينالىق وقىتۋ نەگىزدەرىن يگەرەدى.
باعدارلامالاۋعا قىزىعۋشىلىق تانىتقاندارعا "جاڭادان باستاۋشىلارعا ارنالعان Python" تەگىن كۋرسى بار. بۇل كۋرس الەمدەگى ەڭ تانىمال Python ءتىلىنىڭ نەگىزگى سينتاكسيسىنەن دەرەكقورلارمەن جۇمىس ىستەۋگە جانە نىساناعا باعىتتالعان باعدارلامالاۋعا كىرىسپەگە دەيىنگى تاقىرىپتاردىڭ كەڭ اۋقىمىن قامتيدى.
قازاقستاندا كيبەرالاياقتاردىڭ كۇشەيۋىنە وراي "ينتەرنەت قاۋىپسىزدىگى مامانى" كۋرسى دا وزەكتى سانالادى. مۇندا ينتەرنەت قاۋىپسىزدىگىنىڭ بارلىق نەگىزگى اسپەكتىلەرى قامتىلادى. كۋرستان كەيىن مامان ءتۇرلى سالاداعى كيبەر قاۋىپتەردى ءتيىمدى انىقتاۋعا جانە الدىن الۋعا مۇمكىندىك الادى.
"پروداكت-مەنەدجەر" كۋرسى ونىمدەردى باسقارۋ سالاسىندا مانسابىن دامىتۋدى كوزدەگەن ادامدارعا ارنالعان. كۋرستا وسى سالادا تابىستى مانساپ باستاۋعا قاجەتتى ءبىلىم مەن داعدىلار ۇيرەتىلەدى.
پەرسونالدى باسقارۋ نەگىزدەرىن ۇيرەنگىسى كەلەتىندەر HR مەنەدجەرى كۋرسىن وقي الادى. كۋرستا HR سالاسىنداعى كاسىبي جولىن ەندى باستاعاندار ءۇشىن ارنايى جاسالعان جانە بارلىق قاجەتتى ءبىلىم مەن داعدىلار قامتىلعان.
كۋرستى اياقتاعاننان كەيىن قاتىسۋشى بىلىكتىلىكتى مەڭگەرگەنى تۋرالى سەرتيفيكات الادى، ول ەلەكتروندىق ەڭبەك بيرجاسىنداعى تۇيىندەمەدە اۆتوماتتى تۇردە كورسەتىلەدى.