ساياسي-ەكونوميكالىق رەفورمالار قوعامدا قىزۋ تالقىلانىپ جاتىر.
بۇل رەتتە ەل پرەزيدەنتى دە وي مەن ۇسىنىستىڭ اشىقتىعىنا ءمان بەرۋ كەرەكتىگىن ايتقان ەدى. سەبەبى قازاقستاننىڭ ساياسي، الەۋمەتتىك، ءارى ەكونوميكالىق دامۋى ەڭ الدىمەن حالىقتىڭ الەۋەتى ءۇشىن كەرەك. وسىلاي دەگەن ساياساتكەرلەر بۇگىن كونستيتۋسيالىق رەفورمانىڭ قۇقىقتىق نەگىزىن تالداپ، ونىڭ اسپەكتىلەرىنە جان-جاقتى توقتالدى، دەپ حابارلايدى Almaty-akshamy.kz
«راس، ەلىمىزدە نارازىلىق بار، ءۋاج ايتىلىپ جاتىر، ءتۇرلى تالاپ قويىلدى. مەنىڭشە، ماسەلەنى ۋشىقتىرماي، مەيلىنشە وركەنيەتتى، مادەنيەتتى ساقتاپ، زاڭدىق جولمەن، رەفەرەندۋم مەن سايلاۋ، سايلاۋعا ءتۇسۋ ارقىلى، ءوز ساياسي پارتياڭدى ۇسىنۋ ارقىلى، ءوز ساياسي قوزعالىسىڭدى قۇرۋ، اتسالىسۋ ارقىلى جۇرگىزۋگە بولادى. بۇل اينالىپ كەلگەندە وركەنيەتتى الەمنىڭ قولدانىپ وتىرعان پراكتيكاسى»، – دەدى ساياساتكەر راسۋل جۇمالى.
«كەز كەلگەن مەملەكەت ءۇشىن ساياسي رەفورما تاريحي مانگە يە» دەيدى ماماندار. ال بۇل جولدا ەلدىڭ اق-قارانى اجىراتىپ، بارىنشا ساۋاتتى ارەكەت ەتۋى اسا ماڭىزدى.
«رەفەرەندۋم وتكەلى شيرەك عاسىردان استى، 2-رەت وتكىزىلەيىن دەپ تۇرعان رەفەرەندۋم جانە ترانسفورماسيالىق وزگەرىستەرگە اكەلەدى. ءبىراق ماسەلەنى ۋشىقتىرماي، ىشكى-سىرتقى ساياسي ىقپالداردى ەسكەرە وتىرىپ، وسىنداي وزگەرىستەرگە ابايلاپ بارۋ كەرەك دەپ ويلايمىن»، – دەدى فيلوسوفيا عىلىمدارىنىڭ دوكتورى، پروفەسسور باقىتجان ساتەرشينوۆ.