الداعى رەفەرەندۋم ۋنيۆەرسيتەت ستۋدەنتتەرىنە دە تۇسىندىرىلە باستادى
كونستيتۋسياعا ەنگىزىلگەن وزگەرىستەر بويىنشا رەفەرەندۋم وتكىزۋدى قوعامدىق قولداۋ جونىندەگى قالالىق شتاب باسشىسى راحمان الشانوۆ، ولەسيا كليمەنكو مەن جومارت قۇدايبەرگەن ۇلى 200 ستۋدەنت پەن وقۋ ورنى قىزمەتكەرلەرى جينالعان كوپشىلىك الدىندا ءسوز سويلەدى.
راحمان الشانوۆ رەفەرەندۋمدا ءار قازاقستاندىقتىڭ داۋىسى ماڭىزدى ەكەنىن العا تارتىپ، زاڭ بويىنشا حالىقتىڭ كەم دەگەندە 50%-ى رەفەرەندۋمعا قاتىسپاسا، ونىڭ ناتيجەسى جوققا شىعارىلاتىنىن باسا ايتتى. شتابتىڭ تاعى ءبىر مۇشەسى، جۋرناليست ولەسيا كليمەنكو الداعى رەفەرەندۋم ءبىزدىڭ تۇتاستىعىمىز بەن بىرلىگىمىزدىڭ كورىنىسى بولاتىنىن اتاپ ءوتتى.
«مەن كوپ جىلدان بەرى ەتنو-مادەني سالادا جۇمىس ىستەپ كەلەمىن. نەمىس گازەتىنىڭ رەداكتورى قىزمەتىن اتقارامىن. وسى جىلدىڭ 5 ماۋسىمىندا وتەتىن رەفەرەندۋمدى جالپىۇلتتىق دەپ اتاۋعا تولىق نەگىز بار. سەبەبى، حالىق داۋىس بەرۋ ارقىلى ءوزىنىڭ بىرلىگىن، بەلسەندى ازاماتتىق ۇستانىمىن، جاڭا قازاقستاندى قۇرۋعا نيەتىن كورسەتەدى. ايتىپ وتىرعان وزگەرىستەر سوڭعى بىر-ەكى ايدا پايدا بولعان دۇنيە ەمەس، حالىقتىڭ جىلدار بويى ەلدى باسقارۋعا دەگەن تالپىنىسىنان تۋعان قاجەتتىلىك. سوندىقتان ەل تاعدىرىنا بەي-جاي قاراي المايتىن ءار ازامات داۋىس بەرۋگە قاتىسادى دەپ ويلايمىن»، – دەدى جۋرناليست.
ال ساياسي عىلىمدار دوكتورى جومارت قۇدايبەرگەن ۇلى رەفەرەندۋمنىڭ تەك ساياسي جاقتارىنا توقتالىپ، وزگەرىستەردىڭ اسەرىن جاستارعا ءتۇسىندىردى.
جيىن سوڭىندا ستۋدەنتتەر مەن وقىتۋشىلار تۇسىنبەگەن جەرلەرىن سۇراپ، ءوز ۇسىنىستارىن ءبىلدىرىپ جاتتى. كىشىگىرىم پىكىرتالاس ءوتتى دەسەك تە بولادى.