تۇركىستان وبلىسىنىڭ پروكۋراتۋراسى كەنتاۋ قالاسىندا ورنالاcقان "ارنايى كاسىپتىك كوللەدجدە" وقيتىن 80 ەرەكشە بالانىڭ قۇقىقتارى ورەسكەل بۇزىلعانىن انىقتادى.
بۇل كوللەدج - ەلىمىزدەگى جالعىز مامانداندىرىلعان مۇمكىندىگى شەكتەۋلى بالالارعا ارنالعان وڭالتۋ جانە ءبىلىم بەرۋ قىزمەتتەرىن ۇسىنۋ ءۇشىن قۇرىلعان مەكەمە، دەپ حابارلايدى Almaty-akshamy.kz تۇركىستان وبلىسىنىڭ پروكۋراتۋراسىنا سىلتەمە جاساپ.
پروكۋرورلىق تەكسەرۋمەن كوللەدج باسشىلىعى ۇزاق ۋاقىت بويى زاڭناما تالاپتارىن بۇزا وتىرىپ، ەرەكشە ستۋدەنتتەردى مەملەكەتتىك قىزمەتتەرمەن تيىسىنشە قامتاماسىز ەتپەگەنى انىقتالدى.
ساپاسىز ءبىلىم بەرۋدەگى بۇزۋشىلىقتار، وقىتۋشىلار قۇرامىنىڭ بىلىكتىلىك تالاپتارىنا سايكەس كەلمەۋى، سانيتارلىق جانە ورتكە قارسى نورمالاردىڭ ساقتالماعانى بەلگىلى بولدى.
مەكەمەدە مەرزىمى وتكەن ازىق-تۇلىكتەر مەن ەسكىرۋ مەرزىمى وتكەن مەديسينالىق پرەپاراتتاردى قولدانعان.
مەديسينالىق قارسى كورسەتىلىمدەرى مەن شەكتەۋلەرى بار تالاپكەرلەردى وقۋعا زاڭسىز قابىلداۋ فاكتىلەرىن بىلە تۇرا، تۇركىستان وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىلارى ءتيىستى شارالار قابىلداماعان.
تەكسەرۋ ناتيجەسىمەن زاڭ بۇزۋشىلىقتاردى جويۋ جانە بالا قۇقىقتارىن قورعاۋ ماقساتىندا وبلىس پروكۋراتۋراسى 5 پروكۋرورلىق دەن قويۋ اكتىسىن وبلىس اكىمدىگىنە جانە مەملەكەتتىك ورگانداردىڭ اۋماقتىق دەپارتامەنتتەرىنە ەنگىزدى.